Dızel otynyn Reseıge asyrǵysy kelgen kúdiktiler ustaldy

QOSTANAI. 23 mamyr. Reseı men Qostanaı shekara beketterinde dızel otynyn Reseıge kontrabandalyq jolmen áketkisi kelgen eki oqıǵa tirkeldi, osy ispen aınalysqan eki adam ustaldy. Bul týraly Qostanaı oblysyndaǵy №2031 áskerı bólimshesi shekara jasaǵynyń baspasóz qyzmetine silteme jasaǵan egemen.kz tilshisi habarlady. 48 jastaǵy Jitiqara qalasynyń turǵyny bir tonna solıarkany Reseıge áketpek bolǵan jerinen «Jelqýaravto» ótkizý beketinde ustaldy. Solıarka ol mingen Ford mashınasyn tekserý kezinde tabyldy. Osy oqıǵanyń artyrnsha «Obaǵan» ótkizý beketinen 36 jastaǵy Reseı azamaty ustaldy. Ol on qutyǵa quıylǵan 2 tonna solıarkany Gazel mashınasyna atyp, Qorǵan oblysyna alyp ótpek bolǵan. Energetıka jáne Aýyl sharýashylyǵy mınıstrlikteriniń kelisimi boıynsha elimizdegi bıylǵy jyldyń kóktemgi dala jumystaryna dızel otynynyń bir tonnasynyń baǵasy 95 421 teńge bolyp bekitilgen bolatyn. Iаǵnı, solıarkanyń bir lıtri dıqandarǵa 79 teńgege tústi. Kóktemgi dala jumystary úshin elimizde suranys boıynsha 366,8 myń tonna dızel otyny kerek bolatyn. Oǵan respýblıkalyq bıýdjetten 60 mıllıard teńge qarjy bólindi. Al kórshi Reseıde dızel otynynyń lıtri 35 rýbl, bul 175 teńge degen sóz. Dızel otynyn eki eseden asa qymbatyna satyp, qaryq bolǵysy kelgen pysyqaılar qyraǵy shekarashylardyń quryǵynan qutylmady. Názıra Járimbetova. Derek, foto: №2031 áskerı bólimshesi shekara jasaǵynyń baspasóz qyzmeti.