Reseı muǵajyrynyń uly Avstrııa prezıdenti boldy

ASTANA. 23 mamyr. Avstrııada prezıdent saılaýy ekinshi týrynyń nátıjeleri belgili boldy. Onda azdaǵan daýys artyqshylyǵymen «jasyldar» partııasynyń eks-lıderi 72 jastaǵy Aleksandr Van der Bellen jeńiske jetti. Bul týraly «Vestı.Ru» aqparyna súıengen egemen.kz tilshisi habarlady. Jańa prezıdent atanǵaly turǵan kandıdat saılaýda 50,35 paıyzdyq daýysqa ıe boldy. Onyń ońshyl popýlıstik Avstrııa azattyq partııasynan túsken qarsylasy Norbert Hofer 49,64 paıyzdyq daýys aldy. Eki qarsylastyń arasyn nebári 31 myńnan sál asatyn daýys qana bólip turdy. Sońǵy sátke deıin jurt jeńiske jetedi dep úmit artqan Hofer nátıje resmı jarııalanǵanǵa deıin-aq óziniń utylyp qalǵanyn moıyndady. Ol sosyn «Feısbýk» jelisi arqyly óz saılaýshylaryna alǵys aıtty. Buǵan deıin Norbert Hofer eýroıntegrasııaǵa barynsha qarsy bolyp kelgen, mıgrasııany qalamaıtyn pozısııasymen tanymal edi. Buǵan qaraǵanda, Bellen qalypty solshyl sentrıster kózqarasty ustanyp, eýroıntegrasııaǵa qarsy emes ekenin bildirip keledi. Muny jurt keıde onyń óziniń de muǵajyrdyń, ıaǵnı emmıgranttyń balasy ekenindiginen kóredi. Másele mynada, Aleksandr Van der Bellenniń ákesi Aleksandr Aleksandrovıch (Van der) Bellen – Pskov qalasynyń týmasy. Onyń otbasy XX ǵasyrdyń bas jaǵynda Reseıdi revolıýsııa jalyny sharpı bastaǵan kezde Estonııa arqyly Germanııaǵa qonys aýdarǵan edi. Keıin olar Avstrııaǵa kelip taban tiredi. Aleksandar Van der Bellen 1944 jyly Venada týǵan. Avstrııada prezıdent búkilhalyqtyq saılaý jolymen 6 jylǵa saılanyp, negizinen reprezentıvti fýnksııa atqarady. Al atqarýshy bılikti federaldy kansler basqarady. Sonymen birge prezıdent Avstrııada bas qolbasshy bolyp tabylady, keıbir jaǵdaılarda kanslerdi otstavkaǵa jiberip, parlamentti tarata alady. Talǵat Raıymbek. Derek, foto: Vestı.Ru.