Aqtóbede aýyl jastarynyń sleti ótti

AQTО́BE. 25 mamyr. Aqtóbede "Jastar - aýyl resýrsy" I shekaralyq aýyl jastary sleti ótti. Bul týraly egemen.kz tilshisi habarlady. Oǵan elimizdiń irgeles jatqan Aqtóbe, Atyraý, Batys Qazaqstan, Qostanaı, Qyzylorda, Mańǵystaý oblystarynan, Reseı Federasııasynyń Bashqurtstan Respýblıkasy men Orynbor oblysynan aýyl jastary qozǵalystarynyń kóshbasshylary qatysty. Shara qonaqtarynyń qatarynda Nıderlandydan kelgen saıahatshylar da boldy. Aýyl jastarynyń alqaly jıynyna oblys ákimi Berdibek Saparbaev qatysyp, sletke qatysýshylarǵa quttyqtaý sóz arnady. О́ńir basshysy kez kelgen memlekettiń tiregi jastar ekenin, sondyqtan jastarǵa úlken úmit artylatynyn málimdedi. Mundaı kezdesýlerdiń olardyń oı-órisin keńeıtýge, azamat bolyp qalyptasýlaryna paıdasy zor ekenine toqtaldy. О́tkizilip jatqan sharanyń mańyzy týraly «Jasyl el» jastar eńbek toby respýblıkalyq shtabynyń jetekshisi Rahat Hamıdýllın áserli baıandady. Orynbor oblysy jastar saıasaty departamentiniń ókili Sergeı Týjnıkov aqtóbelik jastarmen burynnan tyǵyz baılanys bar ekenin aıta kelip, jastar saıasatyn júzege asyrýda aqtóbelikterde úlgi alarlyq úlken tájirıbe bar ekenin de jasyrmady. «Aýyl sharýashylyǵyn qarjylaı qoldaý qory» AQ oblystyq fılıalynyń drektory Gúljanat Erǵazına óńirde «Dıplommen aýylǵa» jobasyn júzege asyrý baǵytyndaǵy jumystarmen tanystyrdy jáne jastar kásipkerligin damytý týraly oılaryn ortaǵa saldy.  Slet barysynda aýyl jastary arasynan sharýalar men bıznesmenderdiń, jastar uıymdary kóshbasshylarynyń jobalary tanystyryldy. Shara barysynda, sonymen birge, respýblıkalyq «Gúldene ber, týǵan el!» marafon-estafetasy aksııasy jáne beıresmı pikirtalas alańdary uıymdastyryldy. Satybaldy Sáýirbaı. Derek, foto: egemen.kz