Eń arzan nan

Taraz dúkenderiniń sórelerinen tabylady Nan – toqshylyq, barshylyq bel­gisi. Dastarqannyń tórinde turǵan nan, tipti, nannyń ıisiniń ózi adamnyń kó­ńi­lin hosh etedi emes pe? «Nan bolsa, án de bolady» degen sóz keshegi Keńes zamanynan qalsa da as atasy mol bol­ǵan saıyn elge jut jolamaı­ty­ny anyq. Allaǵa shúkirshilik, el ara­syn­da «Nan joq, nan jetpeı jatyr» degen áńgime joq. Tek «Nan baǵa­sy qym­­bat­­tapty» degendi estip qalaty­ny­­myz ras. Áıtse de jergilikti bılik nan ba­ǵa­syn ósirmeýdiń bar sharasyn qaras­tyrýda. Nan baǵasyn ósirmeý úshin Jambyl oblysynyń turaq­tan­dyrý qorynyń esebinen bıylǵy jyldyń qańtarynda arzan baǵamen 3 myń tonna birinshi surypty un satyp alynyp, onyń 2 800 tonnasy naýbaıhanalarǵa al qalǵan 200 tonnasy turǵyndarǵa kılosyn 77 teńgeden satylýǵa qoıyldy, deıdi bul jóninde Jam­byl ob­lystyq aýyl sharýa­shylyǵy bas­qarmasynyń basshysy Nurjan Nur­jigitov. Bul bıylǵy jyldan bastap nan baǵasyn 53,4 teńge kóleminde turaqtandyrýǵa múmkindik berdi. Endi nan ba­ǵasyn turaqtandyrý sharasyn jalǵastyrý maqsatynda turaqtandyrý qoryna qosymsha 2 myń tonna un satyp alý josparlandy. Qazirgi tańda onyń 1000 tonnasy (kılosy 78 teńgeden) satyp alynyp, naýbaıhanalarǵa kılosy 64 teńgeden bosatylýda. Mine, osynyń arqasynda Jam­byl oblysyndaǵy nan baǵasy respýblıka boıynsha eń tómengi baǵalar qataryna enip otyr. Jáne bul kórsetkish sońǵy 3 jyl boıy turaqty saqtalýda. Budan bólek, asa muqtaj jandarǵa áleýmettik nandy tegin taratýǵa nıet bildirgen Jambyl oblysynyń jeke kásipkerleriniń demeýshiligimen, sondaı-aq, oblys ákimdigi qyzmetkerleriniń qosqan jeke qarjylarynyń esebinen aǵymdaǵy jyldyń 25 qańtarynan bastap Taraz qalasynyń 5 iri saýda oryndarynda jáne kommýnaldyq 10 dúńgirshekterinde kúnine myńǵa jýyq nandy muqtaj jandarǵa tegin alýǵa múmkindikter jasaldy. Aksııa barysynda quny 1,2 mln. teńgeniń 53,4 myń dana nany tegin taratyldy. Oralhan DÁÝIT, «Egemen Qazaqstan» Jambyl oblysy