Shekspırdiń shyǵarmalary 3,6 mln. dollarǵa satyldy

ASTANA. 26 mamyr. Ulybrıtanııa astanasy Londonda arnaıy uıymdastyrylǵan aýksıonda belgili aqyn, dramatýrg Ýılıam Shekspırdiń shyǵarmalar jınaǵy 3 mıllıon 600 myńǵa satyldy. Bul týraly inform.kz-ke silteme jasaǵan egemen.kz tilshisi habarlady. Málimetter boıynsha, onyń arasynda 1623 jyly jaryq kórgen kitaptar da bar. Bul aýksıon aǵylshyn qalamgeriniń qaıtys bolǵanyna 400 jyl tolýyna oraı uıymdastyrylǵan. Bássaýdaǵa qoıylǵan shyǵarmalardyń barlyǵyn amerıkalyq kolleksıoner satyp alǵan. Alaıda, onyń esimi jarııa etilmeı, jasyryn kúıde qaldy. Aıta keteıik, Ýılıam Shekspırdiń qurmetine oraı, Ulybrıtanııada birqatar is-sharalar ótip jatyr. RIA «Novostı» aqparat agenttiginiń habarlaýynsha, osyǵan deıin London qalasyndaǵy kitaphanalardyń birinde kórme uıymdastyrylǵan. Kórmede aqyn ómirine qatysty kóptegen zattar qoıyldy. Ýılıam Shekspır – aǵylshynnyń uly dramatýrgy ári aqyny. О́mirinde kem degende 12 tragedııa , 16 komedııa, 6 tarıhı hronıka jazyp ketken. Onyń pesalary álemniń barlyq tilderine aýdarylǵan. Shyǵarmalary aǵylshyn tiliniń damýyna zor úlesin qosty. Máselen, kóptegen sóz tirkesteri qanatty sóz retinde kúni búginge deıin qoldanylyp keledi. Aıan Ábdýálı. Derek, foto: inform.kz.