HH halyqtyq sport oıyndarynda ulystar da ulyqtaldy

Shyǵys óńirinde el Táýelsizdiginiń 25 jyldyǵyna arnalǵan HH halyqtyq sport oıyndary ótti. Bir aptaǵa sozylǵan dástúrli sport merekesinde óńirdiń barlyq qalalary men aýdandarynan 19 komanda qatysyp, olar sporttyń 16 túri boıynsha synǵa tústi. Bıyl sport oıyndarynyń baǵdarlamasyna olımpıadalyq sport túrlerin qoldaý maqsatynda dzıýdo men erkin kúres qosyldy. Bul spartakıadanyń sonylyǵy sonda, elimizde turatyn kóptegen etnostyń ulttyq sport túrlerinen de jarystar uıymdastyryldy. Atap aıtqanda, qazaqtyń «Asyq atý», orystyń «Lapta», «Gorodkı», «Chehorda», tatardyń «Kýrash», polıaktiń «Balyqshy men balyq», belorýstiń «Potıag» syndy 15 túrli ulttyq oıyn saıysy jankúıerler kóńilin kóterdi. HH halyqtyq sport oıyndary «Vostok» stadıonynda saltanatty túrde ashyldy. – Qazaqstan dúnıejúzine beıbit bastamalarymen, ekonomıkalyq tabysymen jáne sporttaǵy aıtýly jeńisterimen tanylǵan el, – dep oıyndardyń ashylýymen quttyqtaǵan oblys ákimi Danıal Ahmetov dástúrli oıyndar – aımaq jurtshylyǵy asyǵa kútetin sport merekesi ǵana emes, salamatty ómir saltyn qalyptastyrýdyń úlgisi ekenin atap aıtty. О́ńir basshysynyń aıtýynsha, búginde oblys kóleminde 3232 sporttyq qurylym, 35 sport mektebi jumys isteıdi. Bıyl Semeı qalasynda sporttaǵy daryndy balalarǵa arnalǵan ınternat pen oblystyq Jekpe-jek ortalyǵy ashylmaq. Shyǵysqazaqstandyq sportshylar halyqaralyq jáne respýblıkalyq jarystarda 319 medalǵa, onyń ishinde 130 altyn, 119 kúmis, 70 qola medalǵa ıe boldy. О́ńir tarıhynda tuńǵysh ret «Altaı» voleıbol klýbynyń erler men áıelder komandasy el chempıony atanyp, Azııa klýbtarynyń birinshiliginde el namysyn qorǵaýǵa joldama aldy. Jerlesterimiz Rıo-de-Ja­neı­­roda ótetin jazǵy Olım­pıa­da oıyndarynyń 5 joldamasyn utyp aldy. Oıyndardyń ashylý saltanaty este qalarlyqtaı erekshe uıymdastyrylǵanyn aıtqan lázim. Stadıonda qatysýshylar sherýi sap túzep, sportshylar men tóreshiler ant qabyldady, búldirshinder men oqýshylardyń qatysýymen túrli taqyryptaǵy kórinister qoıyldy. Stadıon alańynda «Sport», «Táýelsizdiktiń 25 jy­ly», «Beıbitshilik» ıdeıalary aıqyn kórinis tapqan sahnalyq qoıylymdar sportshylardyń da, jankúıerlerdiń de rýhyn janı túskendeı áser qaldyrǵany ras. Sondaı-aq, áıgili shańǵyshy, Qazaqstan Respýblıkasynyń eńbek sińirgen sport sheberi Alekseı Poltoranın «Deneshynyqtyrý, sport jáne týrızmdi damytýda sińirgen eńbegi úshin» qurmet belgisimen marapattaldy. Ashylý saltanatynyń sońynda voleıboldan elimizdiń ulttyq quramasynyń músheleri, «Altaı» voleıbol klýbynyń oıynshylary Damır Ákimov pen Inna Matveeva oıyn alaýyn jaqty. Oıyn alaýy jar­qyraı janǵan sátten-aq barqyt aspanǵa jamyraǵan jul­dyzdaı merekelik otshashýlar shashyldy. Halyqtyq oıyndardyń alǵash­qy júldelerin jeńil atletshiler sarapqa saldy. O.Rypakova atyn­daǵy jeńil atletıka manejinde uzyndyqqa sekirýden jáne túrli qashyqtyqqa júgirýden jarys­tar ótti. Munda qyzdar arasynda uzyndyqqa sekirýden rekordtyq 4,93 metrge qarǵyǵan óskemendik Polına Pokladovaǵa teń keler eshkim bolmady. Rıoda ótetin Olım­pıada joldamasyna ıe bolǵan rıdderlik Irına Smolnıkova 2 myń metrge júgirýden aldyna jan salmady. Jekpe-jek saraıyn­da ótken erkin kúreste eń kóp medalǵa semeılik balýandar qol jetkizgenin aıta ketken lázim. Olar bes salmaq dárejesiniń tórteýinde júldegerler qatarynan kórindi. Menovnoe atshabarynda ótken kókpar saıysynda 40 kılolyq serkeni qur týlaqtaı tartysqan bilekti de taqymdy kókparshylar ónerinde tarbaǵataılyqtardyń sheberligi aıqyn ańǵaryldy. Qansha degenmen, respýblıkada da olja salyp júrgen oblystyń kókpardan 13 dúrkin chempıony atanǵan komandasy ǵoı. Tarba­ǵataılyqtar bıyl taǵy jeńis tuǵyrynan kórindi. Borodýlıha men Kókpekti aýdandarynyń da kókparshylary osal emes eken. Halyqtyq oıyndardyń sha­ryq­taý shegi – alaman báıge. 25 shaqyrymdyq báıgede Semeıdiń «Vodopad» esimdi sáıgúligi kómbege jeke-dara keldi. Tulpardyń ıe­si Saıat Yqylasov arǵymaqty bap­taǵan eńbegi ótelgenine qýa­nyshty ekenin jetkizdi. Al katon­qaraǵaılyq «Suńqar» ekinshi bolyp kelse, kúrshimdik «Mılan» atty júırik úshinshi bolyp kómbeni attady. «Mılan» sóreden shyqqan alǵashqy sátte sýyrylyp, aldyna qara salmaǵan edi. Sondaı-aq, atshabar aýmaǵynda aqshańqan kıiz úılerdiń kórmesi ótti. Árqaısysy ár taqyrypqa beıim­delgen kıiz úılerdiń kere­meti kóp eken. Máselen, shemonaı­halyqtar dostyqty nasıhattaǵan kıiz úıimen erekshelenip, ózderi de túrli ulystyń tilinde amandasyp jatty. Kókpekti aýdany bolsa, qazaqtyń salqam dáýirin beınelep, handary jarlyq shasha sóılegende, batyrlary arýaq­tana ún qosyp turdy. Ulttyq qol­óner buıymdarynyń úzdik nus­qalaryn qoıǵan kıiz úılerde Abaı aýdanynyń aqboz úıleri uly aqynnyń muralary, kitaptary jınaqtalǵan kitaphanasymen erekshelendi. Bıylǵy sport oıyndarynda jalpykomandalyq júldeler bolǵan joq. Dýman ANASh, «Egemen Qazaqstan» О́SKEMEN