Elimizdiń áıelder quramasy osyndaı tabysqa jetti Keshe Astanada márege jetken bokstan áıelder arasyndaǵy álem chempıonatynda Qazaqstan quramasynyń músheleri Nazym Qyzaıbaı, Dına Jolaman, Valentına Halzova men Lázzat Kúngeıbaeva altyn medal jeńip aldy. Bul synda Nazym Qyzaıbaı Olımpıada chempıony Serik Sápıev aǵasynyń erligin qaıtalap, qazaq qyzdary arasynan birinshi bolyp eki dúrkin álem chempıony atandy. Sonymen birge, Jaına Shekerbekova men Aıman Qojabekova óz salmaq dárejelerinde qola júlde ıelendi. Chempıonatta Jaına qola medal alǵanymen, 51 kıloǵa deıingi salmaq dárejesinde Olımpıada lısenzııasyn ıelendi. Buǵan deıin mundaı joldamany Darıǵa Shákimova alǵan. Ol bıyl Qytaıda ótken halyqaralyq týrnırde áıelder arasynda jalǵyz ózi 75 kılo salmaqta top jarǵan. Bıylǵy álem chempıonaty Qazaqstan boksshylary qatysqan álemdik dodalardyń ishindegi eń tabystysy boldy. Onda elimizdiń ulttyq quramasy jalpykomandalyq esepte birinshi oryndy alyp, buryn-sońdy bolmaǵan jetistikke jetti. Álemdik dodada tórt qyzymyz tuńǵysh ret fınalǵa shyqty. Eger ótken básekelerge qarasaq, 2014 jyly ǵana alǵash ret qazaq qyzy qurmet tuǵyrynyń eń bıik satysyna kóterilgen edi. Sol kezde 48 kıloǵa deıingi salmaqta Nazym Qyzaıbaı ǵana chempıon atansa, Lázzat Kúngeıbaeva kúmis júldeni ıelengen. 2012 jyly Iýldýz Mamatkýlova (81 kg) kúmis medal alsa, Nazym Qyzaıbaı qola júldeger atanǵan. 2010 jyly Marına Volnova ekinshi oryndy, 2008 jyly Alena Kolsova úshinshi oryndy qanaǵat tutsa, 2006 jyly Nazym Boranbaeva álem chempıonatynda qola júldege qol jetkizgen.
N.Qyzaıbaı
D.Jolaman
V.Halzova
L.Kúngeıbaeva
Jarysqa Qazaqstannan 9 boksshy qatysty. Sonyń tórteýi ǵana júldege ilige almady. Rımma Volosenko (60 kg) men Iýldýz Mamatkýlova (81 kg) orta jolda jarysty aıaqtady. Shırek fınalda Zarına Soloeva (64 kg) men Vıoletta Knıazevanyń (75 kg) joly bolmady. Osylardyń barlyǵy chempıonatty jaqsy bastaǵanymen, osy kezeńde qarsylastarynan aılasyn asyra almady. Al fınalǵa jetken tórttik, kerisinshe, sharshy alańnyń shańyn qaǵyp, aldyna kelgen qarsylastaryn aıqyn basymdyqpen utty. Olar shırek fınal men jartylaı fınalda kóp qınalǵan joq. Fınalda birinshi bolyp Nazym Qyzaıbaı jankúıerlerdi qýantty. Ol qytaılyq Iаn Vangpen kezdesip, oǵan eshqandaı múmkindik qaldyrmady. Osydan keıin 54 kıloǵa deıingi salmaqtaǵy Dına Jolaman da álem chempıony ataǵyna ıe boldy. Ol bolgar Stoıka Petrovadan basym tústi. Qazaqstan quramasynan úshinshi bolyp sharshy alańǵa Valentına Halzova kóterilip, álem chempıony ataǵyn jeńip aldy. Sheshýshi kezdesýde Halzova qytaılyq Gý Hondy tize búktirdi. Al 81 kılodan asa salmaqtaǵy boksshylardyń jekpe-jegi fınaldyń kórigin qyzdyrdy. Osy synda 2014 jylǵy Álem chempıonatynyń kúmis júldegeri Lázzat Kúngeıbaeva amerıkalyq Shadasııa Grındi utyp, kópten beri kútken altyn medalin moınyna taqty. Al 51 kıloǵa deıingi salmaqta Jaına Shekerbekova men Aıjan Qojabekova (57 kg) jartylaı fınalda qarsylastarynan utyldy. Alǵashqysy 2012 jyly Londonda ótken Olımpıadanyń chempıony aǵylshyn Nıkola Adamspen kezdesip, ese jiberdi. Degenmen, Shekerbekovanyń odan ese qaıtarýǵa áli múmkindigi bar. Ekeýi Olımpııalyq oıyndarda taǵy kezdesýi múmkin. Al 20 jastaǵy Aıjanǵa ókpemiz joq. Jas bolsa da, bas bola biletin qyzymyz jarysta jaqsy qyrynan kórindi. Ol ózinen úlken boksshylarmen qolǵap túıistirip, jartylaı fınalǵa deıin jetti. Jalpy, bıylǵy synda jattyqtyrýshylar quramynyń eńbegin aıtý kerek. Quramanyń bas jattyqtyrýshysy Vadım Prısıajnıýk, boks mamany Qaırat Manashev pen qyzdardyń jeke bapkerleri chempıonatqa jaqsy daıyndalyp, alǵa qoıǵan maqsatyn tolyǵymen oryndady. Qazaqstan Olımpıadaǵa bir lısenzııany alsa, tórt boksshymyz Álem chempıony, ekeýi qola júldeger boldy. Dastan KENJALIN, «Egemen Qazaqstan»
