Sábeń atyndaǵy saıabaq

Almaty turǵyndaryna esigin aıqara ashty Qala ákimi Baýyrjan Baıbek jazýshy Sábıt Muqanovtyń qaıta jasaqtalyp, jańǵyrǵan saıabaǵyn ashty. Tóle bı men Sábıt Muqanov kósheleriniń qıylysyndaǵy qalamgerdiń eskertkishi qoıyl­ǵan bul saıabaq uly jazýshynyń 100 jyldyq mereıtoıy qur­metine 2000 jyldyń basynda ashylǵan edi. Almaty qalasynyń 1000 jyl­dyǵy qarsańynda qolǵa alyn­ǵan «Qaıyrymdylyq ke­rýeni» jobasy boıynsha jú­rip jatqan is-shara jazýshy atyndaǵy osynaý saıabaqty aınalyp ótpedi. Tanymal jobaǵa Qazaqstan halqy Assambleıasy aıryqsha atsalys­ty. Osy oraı­da ıgilikti istiń aıasynda Almatydaǵy 10 saıabaq pen 94 gúlzar baq qamqorlyqqa alyn­ǵanyn da atap ótken artyq emes. Assambleıa quramyndaǵy respýblıkalyq ázerbaıjandar qaýymdastyǵy tek osy maqsatqa ǵana atap turyp 100 mıllıon teńge qarjy bóldi. Eń eske alarlyq jańalyq qazaqstandyq sol ázerbaıjandar Almatydaǵy Sábıt Muqanovtyń saıabaǵyna záıtún aǵashyn ákelip otyr­ǵyzdy. Uly jazýshynyń eskert­kishi turǵan saıabaqta sol kúni balalar oınaıtyn aıryqsha jańa alań ashyldy. Qaıta túlegen saıabaqtyń ashylý saltanatynda sóz sóı­legen Baýyrjan Baıbek: – Álemdik tájirıbe kórset­kendeı, qala turǵyndary úshin saıabaqtar men gúlzarlardyń alar orny erekshe. Búgingi sal­tanatty sátte elimizdegi ázer­baıjan qaýymdastyǵynyń qal­taly azamattaryna aıryqsha alǵysymyzdy bildiremiz. Saıa­baqqa ártúrli aǵashtyń 90-ǵa jýyq kósheti otyrǵyzylyp, sý qubyry tartyldy. Elbasymyz Nursultan Nazarbaev aıtqan­daı, Qazaqstan halqy Assam­bleıasy shyn máninde búgin úlken istiń shynaıy úlgisin kórsetti, – dedi. Talǵat SÚIINBAI, «Egemen Qazaqstan» ALMATY