Nurly júrek ıesi edi

Iá, bári de bir Allanyń isi deımiz... Degenmen de, aramyzdan shoqtyǵy bıik tulǵalar, onyń ishinde ǵalymdar ketkende... alarynan bereri áli de kóp edi dep, júregimiz qars aıyrylyp, ókinetinimiz ras! Búkil sanaly ǵumyryn áskerı ǵylym jolyna sarp etken polkovnık Qanat Tóleńgitovti eske alǵanda kóz aldymyzǵa tek onyń jaqsylyqty jar salyp jú­retin aqpeıil minezi men aǵalyq qamqorlyǵy keledi. Sum ajalǵa kim arasha bolǵan?! Jazmyshtan ozmysh joq. Aıaýly arysymyzdyń ómirden ótkenine de biraz ýaqyt bolypty. Qanat Faızrahmanuly tiri bolǵanda 45 degen kemel jasqa kelip, aınalasyn nurǵa bólep otyrar ma edi?! Átteń... «О́ldi deýge bola ma, aıtyń­darshy, О́lmeıtuǵyn artyna sóz qaldyrǵan», – dep Abaı dana aıtqandaı, keler urpaqqa azbaıtyn asyl sózderin mura etken adal azamattyń suńǵaq boıy men qashan kórseń de kúlimdep júretin qaǵylez beınesi ony biletinderdiń júreginde árdaıym saqtalary daýsyz. Ol 1971 jyly 27 mamyrda Shyǵys Qazaqstan oblysynyń Úr­jar aýdanyndaǵy Qaratal aýylynda dúnıege keldi. 1988-1993 jyldary Almatydaǵy Qazaq aýyl sharýashylyǵy ınstıtýtynda ınjener-pedagog mamandyǵy boıynsha bilim alyp, keıin osy oqý ornynyń aspırantýrasyn támamdady. Jańashyldyqqa jany yntyq ǵalym kóp ýaqyt ótpeı kandıdattyǵyn qorǵady. Ata-ananyń ulaǵatty ustazdyq jolyn jalǵastyryp, stýdentterge sabaq berdi. 1998 jyldan bastap Qane­keń sol tustaǵy Qazaqstan Res­pýblıkasynyń Ishki áskerine, búgingi Ulttyq ulanǵa qyzmetke qabyldanyp, áskerı ǵylymǵa tereń den qoıyp, qarbalas qyzmetine qaramastan, izdenimpazdyǵyna, shyǵarmashylyq shabytyna shabyt qosyp, ǵylymı jumystarmen belsene aınalysty. Keıin polkovnık Tóleńgitovke IIM Ishki áskerler komıtetiniń jaýyngerlik daıarlyq basqarmasynda ǵylymı jumystardy jolǵa qoıý senip tapsyryldy. Shyntýaıtynda, Qanekeńniń arqasynda atqarylǵan ǵylymı isterdiń aýqymy da óte zor boldy. Jaýyngerlik daıarlyq basqarmasynda oqý jáne ǵylymı jumystar bóliminiń irgesi onyń mańdaıterimen qalanǵany anyq. Oǵan ǵalym ómiriniń sońyna deıin basshylyq jasady. Ulttyq qorǵanys ýnıversıtetinde Ulttyq ulan fakýltetiniń ashylýyna da ólsheýsiz úles qosty. Qanat Faızrahmanulynyń bitim-bolmysy naǵyz qazaqqa tán edi, tabıǵatynda jalǵandyq, jaǵympazdyqqa boı aldyrmaıtyn, júregi únemi elim-jurtym dep soǵatyn ór rýhty azamat-tyn. Baspadan jaryq kórgen árbir dúnıesi úshin balasha qýanyp, máz-meıram bolýshy edi. Ol pedagogıka ǵylymdarynyń kandıdaty, professor, Qazaqstan Áskerı ǵylym akademııasynyń korrespondent-múshesi, Reseı Federasııasy Áskerı ǵylymdar akademııasynyń korrespondent-múshesi, Qazaqstan Pedagogıka ǵylymdary akademııasynyń aka­demıgi syndy ataǵy men abyroıy aspandaǵan mártebeli ataqtar men qurmet belgileriniń ıegeri bolatyn. Qolǵa alǵan salasynyń ún-uńǵymasyn tereń zertteýge talpyný, jyl ozdyrmaı jańa dúnıelerdi týdyrý – shynaıy ǵalymǵa ǵana tán qasıet. Qanat Faızrahmanuly áskerı ǵylymdar salasyna arnalǵan ondaǵan monografııa men oqýlyqtardyń avtory. Budan bólek, ǵalym júzge jýyq ǵylymı maqala jazyp, kóptegen doktoranttardy daıyndady. Professor Tóleńgitov Reseı, Túrkııa, Ortalyq Azııa elderinde ótken halyqaralyq jáne respýblıkalyq ǵylymı-teorııalyq konferensııalarǵa qatysyp, ózekti máseleler tóńi­reginde oı qozǵap, áskerı ǵy­lymnyń tyń taqyryptaryna arqaý bolar mándi de mazmundy baıandamalar jasady. Asyl azamat áýletiniń as­qar taýy bolatyn. Zaıyby Era Mu­hamedjanqyzy da sanaly ǵumyryn quqyq qorǵaý organdary salasyna arnap, názik ıyǵymen leıtenanttan polkovnıkke deıingi asqaraly asýly joldyń júgin eńsergen qazaqtyń polkovnık shenindegi sanaýly qyzdarynyń biri. Búginde Ulttyq ulannyń áskerı polısııa basqarmasynda abyroıly qyzmet etip keledi. «Ornynda bar ońalar» deıdi. О́tken jazda polkovnıkter otbasynyń tuńǵyshy, úsh uldyń úlkeni, Ádilet Túrkııanyń Qurlyq áskerleri akademııasyna oqýǵa tústi. Mine, urpaqtan-urpaqqa aýysqan jaýyngerlik joldyń sabaqtastyǵy degen osy. Týma talant, daryndy azamat, súıikti isine aıanbaı qyzmet etken kórnekti ǵalym Qanat Faızrahmanulynyń ǵasyrlarǵa jalǵasatyn ekinshi ǵumyry endi bas­taldy. Birtýar azamattyń eńbekterin zerdelep, zertteý endi óskeleń urpaq enshisinde. Asyl azamattyń rýhy jánnatta, topy­raǵy torqa, ımany salaýat bolsyn! Eske alýshy Qazaqstan Respýblıkasy Ulttyq ulany Bas qolbasshylyǵynyń jeke quramy