Asqaq aıbynnyń ajary

Keshe Astana qalasyndaǵy Tuńǵysh Prezıdent kitaphanasynda Memlekettik rámizder kúnine arnalǵan is-shara ótti. Onda jıynǵa qatysýshylarǵa rámizderimizdiń tarıhy men paıdalanylý tártibi jóninde keńinen baıandaldy. Jıyn Memlekettik Týdyń saltanatty jaǵdaıda shyǵarylýymen jáne Memlekettik Ánurannyń oryndalýymen bastaldy. Alǵash bolyp sóz alǵan atalǵan kitaphana dırektorynyń orynbasary Japsarbaı Qýanyshev Memleket basshysynyń Jarlyǵymen Táýelsizdiktiń 25 jyldyǵyn merekeleý tujyrymdamasyna sáıkes, maýsym – rámizder aıy bolyp bekitilgenin aıtty. «Búgin osy aıda ótkiziletin merekelik is-sharalar bastalyp otyr. Aldaǵy ýaqytta da búkil elimiz boıynsha osyndaı halyqtyń patrıottyq sezimin oıatyp, rýh beretin ıgi ister júzege asyrylmaq. Memlekettik rámizderge arnaıy kún bel­gi­leýimiz – bizdiń Otanǵa degen mahab­batymyzdyń bir kórinisi», – dedi J.Qýanyshev. О́z kezeginde Tuńǵysh Prezıdent kitaphanasy muraǵat jumysynyń sektor basshysy Jangeldi Bımoldın Elbasynyń jeke muraǵatynan alynǵan materıaldar negizinde memlekettik rámizderdi qaraý jáne bekitý tarıhy týraly áńgimelep berdi. Ol arnaıy beıneslaıd arqyly saqtar zamanyndaǵy memlekettik nyshandardan bastap, Qazaq handyǵy, Reseı ımperııasynyń qol astyndaǵy tus jáne KSRO quramynda bolǵan kezeńderdegi elimizdiń rámizderine toqtalyp ótti. «Bizdiń rámizderimizdiń tarıhy tereńnen bastaý alady. Onyń jarqyn úlgisi retinde Qazaqstan Respýblıkasynyń Memlekettik Eltańbasyn jasaý kezinde Esik qalasynan tabylǵan «Altyn adamnyń» bas kıimindegi keıbir nyshandardyń qoldanylǵanyn aıtsaq bolady. Sondyqtan qazirgi Memlekettik Tý men Eltańbany jasaý kezinde osyndaı tarıhı negizder qaperge alynǵanyn atap ótken jón», – degen J.Bımoldın elimizdiń Kók týy árdaıym kókte jelbireýi úshin ár qazaqstandyq memlekettik rámizderdi júregimen súıýi kerektigin jetkizdi. Elaman QOŃYR, «Egemen Qazaqstan» Al Memlekettik kúzet qyzmeti obektilerdi kúzetý qyzmetiniń maıory Jandos Júsikeev jınalǵan qaýymǵa rásimdik is-sharalarda memlekettik rámizderdi paıdalaný tártibi týraly aıtyp berdi. Onyń sózine qaraǵanda, atalǵan qyzmet memlekettik rámizderdiń etalonyn kúzetip qana qoımaı, olardy kúndelikti jumysta joǵary dárejede qoldanyp keledi. «Memlekettik Tý men Ánurandy rásimdik is-sharalarda paıdalaný arnaıy tártip boıynsha júzege asyrylady. Mysaly, Prezıdentti saltanatty ulyqtaý rásiminde Ánurannyń qaı kezde shyrqalatyny týraly jáne Týdy alyp júrý jóninde belgili normalar men talaptar bar. Sondaı-aq, elimizge mártebeli sheteldik meımandar men memleket basshylary kelgen kezde de bizdiń qyzmettiń ókilderi memlekettik rámizderimiz arqyly aıbynymyz ben áleýetimizdi pash etedi», – dedi J.Júsikeev. Sonymen qatar, obektilerdi kúzetý qyzmetiniń maıory is-sharaǵa qatysqan jastardyń suraqtaryna jaýap berý arqyly, olardy Otanymyzdy súıýge, ultymyzdyń qundylyqtaryn qasterleýge shaqyrdy. Odan bólek, áskerı qyzmettiń qurmetti qaraýyl rotasy saptyq is-qımyldar tásilderin kórsetip, jınalǵan qaýymǵa kóterińki kóńil-kúı syılady jáne qatysýshylar Memlekettik kúzet qyzmetiniń jumysy týraly fılmdi tamashalady. Shara sońynda Tuńǵysh Pre­zı­dent kitaphanasy janyndaǵy «Kemel el» jastardy tárbıeleý orta­lyǵy uıymdastyrǵan memle­kettik rámizder taqyrybyndaǵy semınar-trenıng tyńdaýshylaryna sertıfıkattar tabystalyp, barlyq qatysýshyǵa estelik syılyqtar berildi.