Úzdik brıgadalar úlgisi

«Qazhrom» TUK» AQ fılıaly Aqtóbe ferroqorytpa zaýytynda óndiristiń ár salasynda 385 brıgada tabysty eńbek etedi. Osy brıgadalardyń arasynda ózara jarys ótkizilip, ár toqsan saıyn qorytyndysy shyǵarylyp, úzdikter anyqtalady. Birinshi toqsannyń qorytyndysy boıynsha 11 brıgada úzdik dep tanyldy. Brıgadırler jarysynyń negizgi ól­shem­deriniń negizgileri, árıne, óndiristik kórsetkishter, qaýipsiz eńbek jáne kásip­oryn­nyń ónertapqyshtyq damýyna úles qosý, jumysty durys uıymdastyrý bolyp tabylady. Osyndaı synnan súrinbeı ótip, ózgelerge úlgi bolǵan úzdik brıgadalardyń qatarynda №2 balqytý sehynyń Dáýletqul Raısov, Tileýbaı Mahanov, Jańabek Ábi­shev, Amanjol Kóptileýov basqaratyn balqytýshylar brıgadalary 60 baldyq upaı sanymen úzdik atandy. Sondaı-aq, olardyń qataryn 50-den bastap 60-qa deıingi upaı sandarymen qoıma sharýashylyǵy ýchaskesinen Serik Momynov, hımııalyq saraptama zerthanasynan Zarına Garıpova, elektr jóndeý sehynan Ersin Kajbenov, temirjol sehynan Temirlan Týlýbaev, óndiristi avtomattandyrý jáne baılanys sehynan Gennadıı Izotov, qojdy qaıta óńdeý sehynan Bısenǵalı Tumanov jáne metallýrgııalyq qural-jab­dyqtardy jóndeý sehynan Birtaı Tolybaı basqaratyn brıgadalar birinshi toqsannyń qorytyndysy bo­ıynsha eń úzdik brıgadalar qatarynan kórinip, top jardy. – Bizdiń óndiriste adal eńbek eshqashan eskerýsiz qalmaıdy. Jyl saıyn zaýyt jáne kompanııa kóleminde brıgadalar arasynda jarys ótkizilip otyrady. Jarystyń basty maqsaty – qaýipsiz eńbek, óndiristegi ju­mysty durys uıymdastyrý. Sonymen qatar, apattyń aldyn alý jáne boldyrmaý boıynsha profılaktıkalyq sharalardy júzege asyrý eńbek ónimdiligin, jumys sapasyn arttyrý jáne uıymdastyrý bolyp tabylady. Úzdikterdi anyqtap, olarǵa qurmet kórsetý sııaqty ma­ńyzdy is-sharalar osy jarys sheń­berinde ótkizilip, brıgadalar materıaldyq jaǵynan yntalandyrylady. 2015 jyly №2 balqytý sehynyń Tileýbaı Mahanovtyń brıgadasy úzdik dep tanylyp, qomaqty qarajatqa ıe bolsa, óndiristi avtomattandyrý jáne baılanys sehynyń brıgadasynyń eki jumyskeri tegin joldamamen Qostanaı oblysyndaǵy «Sosnovyı bor» sanatorııinde tynyǵyp qaıtty. Nátıjeli eńbek árdaıym marapatqa laıyq, – deıdi kásipodaq uıymynyń tóraǵasy Baqytgereı Qabanov. Elektrmonterler jumys barysynda asa qyraǵylyq tanytý kerek dep esepteımin. «Arnaıy kıim – qorǵanyń» demekshi, qaýip­sizdik erejelerin qatań saqtaǵan jón. Sebebi, toq kózi qatelesýdi keshirmeıdi. Meniń brıgadam úzdikter qataryn tolyqtyrǵanyna óte qýanyshtymyn. Basty maqsatymyz – eseli eńbek etip, apatty jaǵdaıǵa jol bermeý, – deı­di elektr jóndeý sehynyń brıgadıri Ersin Kajbenov. О́zderiniń mańdaı ter eńbegi jáne kásibı biliktiligimen top jarǵan úzdikter kásiporyn tarapynan laıyqty syı-sııapatqa ıe boldy. Satybaldy SÁÝIRBAI, «Egemen Qazaqstan» Aqtóbe oblysy