Italııa: eski túrmeler otelderge aınalady
Italııa bıligi Rım, Mılan jáne Neapol qalalaryndaǵy tarıhı túrmelerdi satýǵa nıet bildirdi.
Osy tusta olardyń otelder men jekemenshik rezıdensııalar úshin beriletinderi de aıtylyp jatyr. Ázirge saýdaǵa Mılandaǵy San-Vıttore abaqtysy shyǵarylyp tur. Ol 750 tutqynǵa arnalyp 1879 jyly salynǵan eken. Budan keıingi lottarǵa Rımdegi Redjına Koelı (1600 jyl, 600 adam) men Neapoldaǵy Podjoreale (1914 jyl, 2 000 adam) túrmeleri kiredi. Biraq qazir Italııa túrmeleri aýzy-murnynan shyǵyp tur. Sonyń saldarynan 50 myńǵa arnalǵan qapastarda 54 myń sottalýshy otyr.
Eýropanyń jartysy – bir erkektiń balasy
Qazirgi tańda Batys Eýropada turatyn barlyq er kisilerdiń teń jartysy bir adamnyń urpaǵy kórinedi.
Nature Genetics jýrnalynda jarııalanǵan zertteý qorytyndysy olardyń túp atasy qola dáýirindegi aqsúıekter áýletiniń negizin qalaýshy bir kósem ekenin bildiredi. Halyqaralyq ǵalymdar ujymy mundaı tujyrymǵa 26 elde turatyn 1 200 erkektiń Y-hromosomdary arasyndaǵy aıyrmashylyqtardy zertteý nátıjesinde kelgen. Al bul hromosom tek er kisiler arqyly berilip turady.
Tehasta selfıge arnalǵan eskertkish paıda boldy
AQSh-tyń Tehas shtatyndaǵy Shýgar qalasy merııasynyń aldynda aıfonmen avtoportret túsirip turǵan eki qyzdyń qola músini qatarǵa qosyldy.
NBC4 telearnasy atap ótkendeı, bul 10 músinnen turatyn kolleksııanyń birinshi nysany eken. Ol «ózderin ózderi atatyndarǵa» arnalǵan álemdegi birinshi túpnusqalyq monýment bolyp shyqty. Biraq bul ıdeıany jaqtaýshylardan dattaýshylar kóp bolyp ketken. Áleýmettik jelini paıdalanýshylardyń kóbi Tehastan shyqqan tanymal tulǵalarǵa arnalǵan eskertkishterdiń múldem az ekenin alǵa tartyp, qaıdaǵy bir nárseni áspetteýge qarsylyq bildirgen.
Jeti jasar mıllıoner Brazılııada turady
Brazılııa prezıdentiniń mindetin atqarýshy Mıshel Temerdiń ózimen attas jeti jasar uly óz qatarlaryna qaraǵanda, anaǵurlym pysyq bolyp shyqty.
Sońǵy aıda burynǵy prezıdent Dılma Rýsseftiń otstavkaǵa jiberilýine baılanysty eldi ýaqytsha basqaryp otyrǵan joǵary dárejeli sheneýniktiń muragerinde qazirdiń ózinde eki keremet vılla bar. Sondaı-aq, keń kólemdi ǵımarattaǵy ákesiniń shtab-páteri ornalasqan eki ofıs te osy «mıllıoner» balanyń atynda. Osylardyń ózinen quny 570 myń dollar bolatyn jyljymaıtyn múlik shyǵady. Al ákesiniń esepshotyndaǵy 2,14 mln. dollar mólsherindegi aqsha bul sanatqa kirmeıdi.
Latvııa adam esimine de «egemendik» áperedi
Latvııa úkimeti aldaǵy kúzde elde turatyn barlyq azamattardyń aty-jónderi latysh úlgisine keltiriletin zań jobasyn qaraǵaly jatyr.
Osydan bastap bılik basqa ulttardyń jańa týǵan balalarynyń «latysh tilindegi zańdylyqtar negizine sáıkes kelmeıtin nemese qoǵamda aıtýǵa qıyndyq týǵyzatyn» esimderin tirkeýden bas tarta alady. Qujatta nege bas tartylatyny atap kórsetiledi. Al mundaǵy bar jańalyq adam esimi men teginiń sońyna «s» degen qaripti qosyp jazýda eken. Sonda ol latysh tiliniń grammatıkasymen úılesip, el turǵyndarynyń ózara tatýlyǵyn tanytady-mys.
Álemdegi eń rıza týrıster – reseılikter
Reseılikter álemdegi asa rıza saıahatshylardyń kóshin bastap tur. Muny týrıstik servıs portaly málimdedi. 50 el boıynsha derekterdi zerttegen sarapshylar ınternette ózderiniń saparlary týraly rıza kóńil bildiretinderdi anyqtady.
Nátıjesinde birinshi oryn 92,3 paıyzben reseılikterge buıyrǵan. Ekinshi orynǵa 89,9 paıyzben chehtar ornalasqan. Úshtikti 89,5 paıyzben polshalyq týrıster qorytyndylaıdy. Eń rıza emes saıahatshylardy 18,5 paıyz kórsetkishpen ońtústikkoreıalyq týrıster bastap tur. Olardan keıin meksıkalyqtar atalyp otyr – 14,8 paıyz. Rıza emestilerdiń úshtigin 14,6 paıyzben malaızııalyqtar túıindegen.
Aqparat agenttikteriniń materıaldary negizinde daıyndaldy
