1200 jyldan beri jatqan taza sý

Grýzııanyń Kahetııa aıma­ǵyndaǵy Kvarelı degen jerde V ǵasyrdaǵy qala ornyna júrgizilgen arheologııalyq qazba jumystary barysynda sharap quıýǵa arnalǵan kvevrı ydysy tabyldy. Onyń ishi taza sýǵa shópildep tolyp tur eken. Al qumyra syrtyndaǵy jazý onyń VIII ǵasyrda jasalǵanyn kórsetken. Sonda kvevrıge sýdyń quıylǵanyna shamamen 1200 jyldaı merzim bolǵany aıǵaqtala túsedi. Arheologııalyq ekspedı­sııa­nyń jetekshisi Nodar Bah­tadzeniń aıtýynsha, «Djordjıan Ýoter end Paýer» kompanııa­sy júrgizgen zert­hanalyq tek­serýdiń nátıjesinde shamamen 1200 jyldan astam ýaqyt ydys ishinde turǵan sý barynsha taza, tipti, ishýge de ábden jaramdy bolyp shyqqan. Sýdyń quramynan eshqandaı bakterııa tabylmaǵan. Taǵy bir anyqtalǵany, ol jań­byrdyń emes, bulaqtyń sýynan alynǵan. Ekspedısııa basshysy sýdy ózi iship kórgenin jetkizgen. Onyń shamaly bóligin jergilikti patrıarhııa ókilderi de alyp ketken. Dinı qyzmetkerler sýdy sonshama jyldar aralyǵynda qasıetti bolyp ketkenin, sondyqtan osy kezge deıin taza qalpyn saqtap kelgenin aıtady. Murat AITQOJA