Aýyr atletıka: chempıonat alǵashqy júlde ıelerin anyqtady

TALDYQORǴAN. 4 maýsym. Almaty oblysynyń ortalyǵyndaǵy «Jastar» sport saraıynda keshe bastalǵan Qazaqstannyń erler jáne áıelder arasyndaǵy chempıonaty óziniń alǵashqy chempıondaryn anyqtady. Bul týraly egemen.kz tilshisi habarlady. Juma kúni jarystyń birinshi kúni aıaqtaldy. Onda erlerdiń 56 kıloǵa deıingi salmaqtaǵy júldegerleri belgili boldy. Birinshiliktiń altyn medalin qossaıysta 256 (116+140) kg salmaq alǵan Igor Son  jeńip aldy. Ekinshi oryndaǵy Rahat Beısenbaev 183 (80+103) kg salmaqpen odan 73 ball artta qalyp qoıdy. Úshinshi orynǵa shyqqan Vıtalıı Aýhadıev 178 (82+96) kg salmaq kóterdi. Áıelderdiń 48 kıloǵa deıingi salmaǵynda Aleksandra Lachkova top jardy. Ol 143 (67+85) kg salmaqty baǵyndyrdy. Ekinshi oryndaǵy Galına Momotova odan 14 kg qalyp qoıdy. Al úshinshi satyǵa kóterilgen Ksenııa Koroleva 106 (45+61) upaı jınady. Budan keıin áıelderdiń 53 kıloǵa deıingi salmaqtaǵy saıysy bolyp ótti. Ol Azııa oıyndarynyń chempıony Margarıta Elıseevaǵa shaq keletin eshkimniń joq ekenin kórsetti. Lıder qossaıysta 200 (88+112) kılo salmaq kóterdi. Budan bólek, Qazaqstannyń aldaǵy Olımpııalyq oıyndarǵa baratyn quramasynyń kandıdaty retinde oǵan ár jattyǵý boıynsha taǵy bir retten talpynys jasap kórýge ruqsat etildi. Esepke alynbaıtyn osy áreketterde ol julqa kóterýde – 90, serpe kóterýde 115 kılo salmaqtardy tóbesinde tik ustap turdy. Sóıtip, Rıoda 205 kg salmaq úshin kúrese alatynyn kórsetti. Búgin chempıonattyń ekinshi kúninde erlerdiń 62 kg, áıelderdiń 58 jáne 63 kg salmaqtarynda saıys ótedi. Nurbol Áldibaev. Derek: egemen.kz.