Zıka bezgegi Qazaqstanǵa da taralýy múmkin

ASTANA. 4 maýsym. Álemniń kóptegen elderine taraǵan qaýipti zıka indeti Qazaqstanǵa da taralýy múmkin. Bul týraly inform.kz-ke silteme jasaǵan egemen.kz tilshisi habarlady. Otandyq vırýsolog mamandary atalǵan indettiń taıaýda Qytaıǵa kelgeninen qaýiptenip otyr. Sonymen qatar, Pavlodar oblysyndaǵy jaǵdaı da alańdaýshylyq týdyrýda. Sebebi, bul aımaqta masa men shybyn-shirkeı shekten tys kóbeıip ketken. Al professor Andreı Bogoıavlenskıı masanyń vırýs tasymaldaýǵa beıim ekenin málimdedi. «Qazaqstandaǵy joǵary ylǵaldylyq pen aýa raıynyń tym ystyq bolýyna baılanysty keıbir masa túrleri Ońtústik-Shyǵys Azııadan kelýi múmkin. Taralyp ketedi dep senimdi túrde aıta almaımyn. Alaıda, ondaı jaǵdaılar oryn alýy múmkin», – dedi Andreı Bogoıavlenskıı. Dúnıejúzilik densaýlyq saqtaý uıymy zıka vırýsyn álemdik aýqymdaǵy indet qataryna jatqyzdy. Qazirgi tańda ol 70-ke jýyq memleketke tarady. Aıan Ábdýálı. Derek, foto: inform.kz.