Islam Karımov táýelsizdiktiń 25 jyldyǵyn toılaýdy qolǵa aldy

ASTANA. 4 maýsym. О́zbekstan prezıdenti Islam Karımov el táýelsizdiginiń 25 jyldyǵyn toılaýǵa daıyndyq pen ony ótkizý týraly qaýlyǵa qol qoıdy. Bul týraly «Sputnik Ýzbekıstan» aqparyna súıengen egemen.kz tilshisi habarlady. Qaýlyda táýelsizdik toıyna daıyndyq júrgizý men ony ótkizý jónindegi respýblıkalyq komıssııanyń quramy bekitilgen. Oǵan boıyna «О́mirim meniń, taǵdyrym meniń – qaıtalanbas týǵan jerim О́zbekstan!» atty basty ıdeıany sińiretin uıymdastyrý-praktıkalyq, mádenı-aǵartý jáne aqparattyq-túsindirý baǵdarlamasyn jasaý tapsyryldy. Komıssııa sondaı-aq, belgili ǵalymdardan, ádebıetshilerden jáne artısterden quralatyn rýhanı-aǵartý toptaryn jasaqtaıtyn bolady. Mereke aıasynda «Eń uly, eń qymbatty», «Otan úshin ómir súr», «Otan beınesi – sýretshi kózimen», «Seni ánge qosamyz, zamandas!», «Táýelsizdik jylnamasy», «Bul – meniń Otanym» sekildi kóptegen jastar festıvalderi men konkýrstary ótkiziledi. Talǵat Raıymbek. Derek, foto: Sputnik Ýzbekıstan.