Lańkestik oqıǵaǵa qatysty sharalar baqylaýda bolady

Keshe Úkimettiń selektorlyq otyrysynda Aqtóbedegi qandy oqıǵaǵa qatysty aqparattar aıtyldy. Otyrysty ashqan Premer-Mınıstr Kárim Másimov aldymen barsha musylman qaýymyn qasıetti Ramazan aıynyń bastalýymen quttyqtady. «О́kinishke qaraı osy qasıetti aıda Aqtóbe qala­synda qandy oqıǵa oryn aldy. Birneshe adam qaza tapty. Jaraqat alǵandar da bar. Bul óte óki­nishti jaǵdaı», dedi K.Másimov. Bul oqıǵa jaıynda Ishki ister mınıstri Qalmuhanbet Qasymov baıandady. Q.Qasymovtyń málimdeýinshe, 5 maýsym kúni jergilikti ýaqyt boıynsha saǵat 14.28-de teris aǵymdaǵy din ustanýshylar qarý-jaraq ıemdený maqsatymen «Pallada» dúkenine shabýyl jasaǵan. Dabyl knopkasyn basyp úlgergen dúken satýshysyn qylmyskerler pyshaq­tap óltirgen. Oqıǵa ornyna eń birinshi bolyp «Jedel kúzet» JShS kúzet uıymynyń 2 qyzmet­keri jetip, onyń biri birden oqqa ushyp mert bolsa, ekinshisi jara­qattanǵan. Osydan keıin polısııa qyzmetkerleri de kelip, qyl­mys­kerler olarǵa qarýly qarsylyq tanytqan. Atys barysynda 3 polısııa qyzmetkeri jaralanǵan. Qylmyskerler patrýldik mashınamen boı tasalaǵan. Olar dúkennen 17 myltyq, 3 gaz tapanshasyn, oqtar men pyshaqtardy alyp ketken. Urlanǵan qarý-jaraq pen oq-dárilerdiń sany naqtylanýda, dúkende túgendeý júrgizilýde. «Pallada» dúkenine shabýyl jasa­ǵannan keıin qarýly qylmyskerler eki topqa bólingen. 6 qylmyskerden jasaqtalǵan birinshi top «Pantera» qarý-jaraq dúkenine shabýyldap, onda bir adamdy pyshaqtap óltirse, ekinshisin jaraqattaǵan. Oqıǵa ornyna jetken polısııa qyzmetkerleri 3 qylmyskerdi atyp óltirse, bireýi jaraqattanǵan. Al ekeýi boı tasalap úlgergen. Degenmen, olar sál keıinirek qala syrtynan tabylyp, kózderi joıyldy. Ekinshi top avtobýsty basyp alyp, jolaýshylardy túsirip jibergen. Osydan keıin Ulttyq gvardııanyń 6655 áskerı bólimi aýmaǵyna kireberis qaqpany avtobýspen buzyp kirgen jáne áskerı qyzmetshilermen, oqıǵa ornyna jetken polısııamen atysqan. Qarýly qarsylyqqa tap bolǵan qylmyskerlerdiń bir toby tosqaýylǵa túsip qalsa, ekinshi toby qashyp ketken. Atys barysynda 1 qylmysker ólip, taǵy biri jaraqattanǵan. Al Ulttyq gvardııanyń 3 áskerı qyzmetshisi qaza taýyp, 6-ýy jaralanǵan. Olardyń barlyǵy da qarýsyz bolǵan, ishki rejimge sáıkes qyzmetterin atqaryp júrgen», dedi mınıstr. Q.Qasymov qazirgi ýaqytta Aqtóbe oblysynda lańkestikke qarsy operasııa rejimi engizilgenin, elimizdiń ishki ister organdarynyń barlyq jeke quramy kúsheıtilgen qyzmetke kóshirilgenin atap ótti. «Ishki ister mınıstrligi jergilikti atqarýshy organdarmen birlesip, qaza tapqan jáne jaraqattanǵan Ulttyq gvardııanyń áskerı qyzmetshileri men polısııa qyzmetkerleriniń otbasyna materıaldyq kómek kórsetý sharalaryn qabyldaýda», dedi mınıstr. Budan keıin Aqtóbe qalasyndaǵy qoǵamdyq-saıası jaǵdaı jóninde oblys ákimi Berdibek Saparbaev habarlady. «Qazirgi kezde oblysta qoǵamdyq-saıası jaǵdaı turaqty jáne jergilikti atqarýshy jáne quqyq qorǵaý organ­darynyń tolyqtaı baqylaýynda tur. Qaraqshylyq shabýyl týraly málimet kelip túskennen keıin jergilikti baspasóz, áleýmettik jeliler arqyly halyqqa sabyrlyq tanytyp, ǵımarattan shyqpaý, júristi shekteý týraly habar berildi», dedi B.Saparbaev. Oblys ákiminiń aıtýynsha, óńirlik jedel shtab qurylyp, ishki ister departamenti bastyǵynyń jetekshi­ligimen lańkestikke qarsy ortalyq jumys istep tur. Barlyq quqyq jáne arnaýly organdar arasyndaǵy is-qımyl úılestirilgen. Barlyq kommýnaldyq qyz­metter, qoǵamdyq kólikter, medı­sına­lyq mekemeler shtattyq rejimde jumys isteýde. «Ulttyq biryńǵaı testileý 7 maý­symǵa aýystyryldy. Tolyqtaı alǵanda oblys halqy lańkestikke qarsy operasııanyń júrgizilýine túsi­nis­tikpen qaraýda. Qaza tapqan áskerı qyzmetshilerdiń otbasylaryna materıaldyq kómek kórsetiletin bolady», dedi B.Saparbaev. Ulttyq biryńǵaı testileý 7 maýsymǵa aýystyrylǵanyna baılanysty aqparatty Bilim jáne ǵylym mınıstri Erlan Saǵadıev tolyqtyryp ótti. «Keshe keshkisin balalardyń qaýipsizdigi úshin eki pýnkttegi Ulttyq biryńǵaı testileýdi ótkizý merzimin 7 maýsymǵa aýystyrý týraly sheshim qabyldandy. Ata-analar men ustazdarǵa qajetti málimetter berildi. Barlyq pýnkt­terde UBT shtattyq rejimde júrgizilý ústinde. Eger sizdiń tarabyńyzdan tapsyrma bolatyn bolsa, onda men Aqtóbege ózim baryp, jaǵdaıdy baqylaýǵa alamyn», dedi mınıstr Premer-Mınıstrge qarata aıtqan sózinde. Kárim Másimov Erlan Saǵadıevke Aqtóbede ulttyq biryńǵaı testileýdiń durys ótýin baqylaýǵa alýdy tapsyrdy. «Baryńyz, jınalystan keıin ushyp ketińiz. Oblys ákimimen birlesip, bul máseleni baqylaýǵa alyńyz», dedi Úki­met basshysy. Al Densaýlyq saqtaý jáne áleýmettik damý mınıstri Tamara Dúısenova oqıǵadan jaraqat alǵandar sanyn málimdedi. «Dál qazirge deıin 38 adam medısı­nalyq kómek alyp, 2-eýi qaza tapty. Jeńil-jelpi jaralanǵan 15 adam qabyldaý bólmelerinde qaralyp, ambý­latorııalyq emdelýge jiberildi. 20 adam aýrýhanaǵa jatqyzyldy. Onyń ishinde 14-ine ota jasaldy, taǵy 3-eýine qazir ota jasalýda. 9 adamnyń jaǵdaıy óte aýyr. Keshe 6 jetekshi hırýrg mingen sanıtarlyq avıasııa ushyp ketti. Ota jasaýǵa tolyq qatys­ty. Olar búgin tańerteń oraldy», dedi T.Dúısenova. Bul máselege oraı qorytyndy sózinde Úkimet basshysy oqıǵaǵa qatysty qolǵa alynǵan is-sharalardy jiti qadaǵalaıtynyn atap ótti. «Memleket basshysy bul máseleni óz baqylaýynda ustap otyr. Kúsh-qýat organdary bul operasııany sońyna deıin júrgizýi tıis. Ákimdikter, barlyq memlekettik organdar sáıkesinshe sharalar qabyldaýy qajet. Al odan ári qaraı qorytyndy shyǵaratyn bolamyz. Biz bul rette birqatar keshendi sharalar qabyldaýymyz kerek. Memleket basshysynyń tapsyrmasyna sáıkes bul máseleni men óz baqylaýyma alamyn», dedi K.Másimov. Dınara BITIKOVA, «Egemen Qazaqstan»