«Nur Otan» partııasy Tóraǵasynyń birinshi orynbasary Muhtar Qul-Muhammed óziniń Almaty qalasyna jasaǵan jumys sapary aıasynda qalalyq partııa fılıalynyń qyzmetkerlerimen jáne Qazaq ulttyq agrarlyq ýnıversıteti túlekterimen kezdesip, elimizdegi eń iri nan óndirý zaýytynda boldy.
Qalalyq partııa uıymynyń qyzmetkerlerimen bolǵan kezdesý barysynda Muhtar Qul-Muhammed partııa Tóraǵasy Nursultan Nazarbaev «Nur Otannyń» qyzmetin barlyq basym baǵyttar boıynsha nyǵaıtý jóninde tapsyrma bergenin atap ótti. Kúsh-jiger Qazaqstannyń 2050 jylǵa deıingi Damý strategııasyn, «100 naqty qadam» Ult Jospary men «Nurly Jol» memlekettik baǵdarlamasyn júzege asyrýǵa baǵyttalatynyn nazarǵa saldy. Osy oraıda «Nur Otan» elimizdiń jetekshi saıası partııasy retinde Prezıdentimizdiń memlekettik saıasatyn oryndap qana qoımaı, partııa aldyna Elbasy qoıǵan barlyq mindetterdiń oryndalý sapasyna turaqty túrde baqylaý júrgizýi tıis ekendigi aıryqsha aıtyldy.
– Táýelsizdiktiń altyn besigi bolǵan Almaty qalasy «Nur Otan» partııasynyń elimizdegi eń úlken qalalyq fılıaly retinde óziniń áleýetin «100 naqty qadam» Ult Josparyn jemisti júzege asyrý maqsatynda aıqyn tanytýmen qatar, elimizdiń ózge óńirlerine de úlgi bolady dep senemiz. Elbasy memleketti qaryshtap damytý maqsatynda qabyldaǵan bes ınstıtýttyq reforma el múddesin kózdegen 59 zańmen myqtap bekemdeldi, sondaı-aq, qoǵamda túsindirý jumystarynyń júrgizilmeýi saldarynan týyndaǵan túsinispeýshilik máselesine erekshe kóńil bólinip otyr. Memleket basshysy jáne partııa Tóraǵasy sizderge qala jastarymen belsendi jumys atqarýǵa jáne olardy qatarǵa tartý arqyly partııa qataryn nyǵaıtýdy tapsyrdy. Budan ózge, Memleket basshysy el ishinde túsinispeýshilikke tap bolǵan jer máselesine moratorıı jarııalady, osylaısha bizge jer reformasyna qatysty barlyq baptardy halyqqa túsindirýge múmkindik berdi, – dedi M.Qul-Muhammed. Partııa basshysynyń birinshi orynbasary «Almaty jastardyń qalasy» ekenine arnaıy toqtalyp ótti. Sol sebepti jastarmen jumysty kúsheıtýge jáne olardy partııalyq jumysqa tartýǵa basymdyq berýge shaqyrdy.
Búginde «Nur Otan» partııasynyń Almaty qalalyq fılıaly 690 bastaýysh partııa uıymyn biriktirip otyr. Sońǵy jarty jyldyń ózinde ǵana 11 myńnan astam qala turǵyny partııa qataryna ótip, Qazaqstannyń eń iri qalasy atalatyn Almatyda partııadaǵylar sany 77 myńnan asyp tústi. Partııa músheleriniń qatary aıtarlyqtaı ósýine baılanysty ári partııa qyzmetin odan ári kúsheıtý maqsatynda qalanyń Bostandyq aýdanynda «Nur Otan» partııasynyń jańa ǵımaratyn salý jóninde sheshim qabyldanǵan bolatyn. Partııa Tóraǵasynyń birinshi orynbasary onyń qurylysymen de tanysty.
«Nur Otannyń» qalalyq fılıaly 2016 jyldyń basynan beri 370-ten astam shara ótkizgen. Atqarylǵan jumystardyń basym baǵyttarynyń qatarynda partııanyń qoǵamdyq qabyldaý bólmeleri men Sall-center ortalyqtary arqyly kelip túsken ózekti máselelerdi anyqtaý jáne sheshý qala turǵyndarymen ózara áriptestikti nyǵaıtý, sonymen qatar, bıýdjet qarjysynyń jumsalý tıimdiligine taldaý jasaý isi kóptep kezdesedi. Sondaı-aq, partııa jer reformasyna qatysty qurylǵan jalpyulttyq pikir almasýdy uıymdastyrýda da úlken ról atqaryp otyr.
– Almatyda turǵyn úı-kommýnaldyq ınfraqurylymdy jańǵyrtý úshin 9,2 mıllıard teńge bólindi, ázirge onyń 20 paıyzy ǵana ıgerilgen. Partııa uıymynyń mindeti – ol qarajattyń maqsatty jumsalýyn qadaǵalaý jáne únemi monıtorıng júrgizip otyrý. 2015 jyly Údemeli ındýstrııalyq-ınnovasııalyq damý baǵdarlamasy aıasynda Almatyda iske qosylǵan 21 jobanyń jartysy ǵana jobalyq tıimdi áleýetke ıe bolyp otyr, – degen partııa basshysynyń birinshi orynbasary Qoǵamdyq keńes mamandarynyń qýatyn tıimdi paıdalanyp, olardyń jumys qabiletin arttyrý kerektigin, «Nurly Jol» baǵdarlamasynyń júzege asý barysyn partııalyq baqylaý turǵysynan muqııat qadaǵalaýdy tapsyrdy.
Jer máselesi M.Qul-Muhammedtiń Qazaqstandaǵy eń iri nan zaýytynyń ujymymen kezdesý barysynda basty taqyrypqa aınaldy. Táýligine 150 tonnadan astam nan ónimderin óndiretin «Aqsaı-nan» JShS respýblıkada óndiris kólemi jáne tehnologııalyq damý deńgeıi boıynsha kósh bastap tur. Zaýyt qyzmetkerleriniń Jer kodeksine qatysty saýaldaryna jaýap bere kele, «Nur Otan» partııasy Tóraǵasynyń birinshi orynbasary Qazaqstannyń álemdik naryqqa tek bıdaı ónimderin shyǵaryp qana qoıýy jetkiliksiz ekendigin alǵa tartty.
– Qazaqstan álemdik naryqqa bıdaı ónimderin shyǵaryp qana otyrýy jetkiliksiz. Bizdiń elimiz eń úlken astyq óndirýshi el retinde osy aýyl sharýashylyǵy ónimderin, astyq ónimderin odan ári óńdeıtin jańa tehnologııalar ákelýi kerek. Ol úshin bizge ınnovasııa, shetten ınvestısııa, osy zamanǵy eń ozyq tehnologııa kerek. Sonda ǵana bizdiń elimiz aldyńǵy qatarly damyǵan agroındýstrııaly el bolady. Jer reformasynyń basty maqsaty da osy dep bilemin, – dedi M.Qul-Muhammed.
Partııa Tóraǵasynyń birinshi orynbasary Qazaq ulttyq agrarlyq ýnıversıtetiniń professorlyq-oqytýshylar quramymen kezdesip, elimizdiń aýyl sharýashylyǵyn jańǵyrtý máselelerin talqylady. Mundaǵy kezdesýge aýyl sharýashylyǵy salasynda jumys isteıtin ǵylymı-zertteý ınstıtýttarynyń 30-dan astam jetekshisi qatysqanyn aıta ketýge tıispiz. Al búginde 85 jyldyq tarıhy men ulttyq mártebesi bar agrarlyq ǵylym men bilimniń qara shańyraǵy – Qazaq ulttyq agrarlyq ýnıversıteti oqytýshylar quramy men stýdentteri, kelgen meımandar «Nur Otan» partııasy Tóraǵasynyń birinshi orynbasary M.Qul-Muhammed oqyǵan dáristi úlken qyzyǵýshylyqpen tyńdady.
«Eń qasıetti qundylyq» degen taqyrypta kópshilikpen oı bólisken dáristik sharany Qazaq ulttyq agrarlyq ýnıversıtetiniń rektory, Qazaqstan Respýblıkasy Ulttyq ǵylym akademııasynyń akademıgi Tilektes Espolov sóz sóılep ashty. Ýnıversıtet basshysy kópshilik aldynda sóılegen sózinde Qazaqstan aınalasy 25 jyl ishinde ǵana ǵasyrǵa tatıtyn tarıhı joldan ótip úlgergendigin, el táýelsizdiginiń arqasynda órkenıetti memlekettermen terezemiz teńesip, ekonomıkamyz ındýstrııalyq-ınnovasııalyq baǵytta óristep, halyqtyń ál-aýqaty jaqsarǵanyn, álemdik saıası arenada Qazaqstan óziniń naqty orny men bedelin aıqyndaǵanyn aıtyp ótti. Bul jetistikterdiń barlyǵy Elbasy Nursultan Nazarbaevtyń kóregen saıasaty men memleket basqarýdaǵy kemeńgerliginiń arqasynda múmkin bolǵan tarıhı shyndyq ekendigin jetkizgen ýnıversıtet basshysy Qazaqstandaı jeri ulan-ǵaıyr, qazynasy tasyǵan memleketke tutqa bolar jastar el tizginine tek bilim men ónerdiń arqasynda myǵym ıe bola alatyndyǵyn tilge tıek etti.
– Men, «Nur Otan» partııasy Saıası keńesiniń jáne partııanyń Almaty qalalyq fılıaly bıýrosynyń múshesi retinde, «Nur Otan» partııasynyń Almaty qalasyndaǵy eń iri bastaýysh uıymyna tikeleı jetekshilik etip kelemin. Bul tek maǵan emes, ýnıversıtet ujymyna degen kóshbasshy partııanyń úlken senimi dep bilemin. Sonymen birge, ýnıversıtet ujymy jetekshi partııanyń barlyq ortalyqtarymen, sondaı-aq, stýdentterimiz partııanyń «Jas Otan» jastar qanatymen tyǵyz baılanysta nátıjeli jumys atqarýda. Búgingi kezde elimizdiń órkendep, damýyna, qoǵamdaǵy saıası turaqtylyq pen kelisimniń nyǵaıýyna «Nur Otan» partııasynyń qosqan úlesi zor, – dedi akademık T.Espolov.
Jıynnyń basty qonaǵy – Muhtar Abraruly 1991 jyldyń 16 jeltoqsanynda Táýelsizdik degen asyl qundylyǵymyzdyń ońaı jolmen kelmegendigin tarıhı dáıekterdi keltire otyryp, tushymdy jetkizdi.
– Amerıkany alyp el, uly derjava etý jolynda Vashıngtonnan bastap Qurama Shtattardyń árbir zańy men talabyna eńbegi sińgen alyp tulǵalar tur. Qanshama ǵasyrlardan beri Amerıkanyń áskerı, ekonomıkalyq, azamattyq áleýetin jaqsartýmen áıgili zańgerler, ekonomıster, qarjygerler aınalysyp, búginde álemge aty áıgili memleketti qalyptastyrdy, al bizde ony bir ǵana adam shırek ǵasyr muǵdarynda atqarýda. Ulttyq valıýtamyz bolmap edi – tól teńgemizdi shyǵaryp berdi, shekaramyz tanylmap edi – irgemizdi shegendep, aýmaqtyq tutastyǵymyzdy anyqtap berdi, ekonomıkadaǵy keńestik qatynastar ǵana qalyptasqan jerlerdi naryqtyq qatynasqa ózgertip berdi, eń alǵash «2030» dep eldik damýymyzdy kózdegen tuńǵysh Joldaýyn jarııalap, Qazaqstandy álemdegi asa damyǵan 50 eldiń qataryna merziminen buryn qosyp berdi. Osynyń bári qazaq degen ulttyń keleshegi úshin atqarylǵan telegeı-teńiz eńbektiń bir parasy ǵana, – dedi M.Qul-Muhammed óziniń dárisinde.
Atalǵan jıynda qoǵamda qyzý talqylanyp jatqan jer máselesi de sóz bolyp, Muhtar Abraruly eshqandaı qujatta shetel azamattaryna jerdiń, anyǵyn aıtqanda, aýylsharýashylyq jerleriniń satylýy jaıly birde-bir sóılemniń jazylmaǵandyǵyn alǵa tartty. Sonymen qatar, «Nur Otan» partııasy Tóraǵasynyń birinshi orynbasary jastarǵa Táýelsizdik alý jolynda el aǵalarynyń atqarǵan úlken azamattyq eńbegi men bastarynan ótkergen qıyn-qystaý shaǵyn, egemendiktiń elge belgisiz tustary men el bile bermeıtin erleri týraly, jasalǵan erlikter týraly mándi de maǵynaly dárisimen stýdent qaýymdy úıirip aldy. Aýmaqtyq tutastyq úshin bolǵan keńester men jasalǵan shuǵyl sheshimder, tól valıýta – teńgemiz týraly, ulttyq qundylyqtarymyz – til, din, dil máseleleri men onyń názik tustaryna qalaı ıe bolý, ulttyq ásker, ekonomıka-naryq, túrli ult ókilderi bas qosqan bir shańyraq astynda qandaı saıasat júrgizý kerektigin, Memleket basshysynyń halyqaralyq saıası sahnadaǵy salmaǵy men abyroı-bıigi jóninde, eldegi saıası-ekonomıkalyq baǵdarlamalar haqynda maǵynaly áńgime qozǵaldy.
– Jer máselesi – qaı elde, qaı qoǵamda bolsa da óte názik másele. Qazaq qoǵamynda árqashanda jerdiń ıesi bolǵan! Jerge degen kútim qazaq halqynda ejelden bolǵandyǵy hakim Abaıdyń «Erte barsam jerimdi jep qoıam dep, Yqtyrmamen kúzeýde otyrar baı» degen bir shýmaq óleńinen-aq kórinip tur. Sondyqtan da, búgingi jaǵdaı oqystan týyndaǵan másele emes. Jerdiń ıgiligin halyqqa kórsetý úshin damyǵan elderdiń áleýeti men ǵylymı jańalyqtaryn paıdalanýymyz kerek. Qazaqtyń baılyǵy onyń maly emes, onyń jer asty baılyǵy emes, onyń jeri ǵana emes, qazaqtyń baılyǵy – qazaqtyń ózi! Qazaqtyń sanyn qazaq qana kóbeıtedi. Eń qasıetti qundylyǵymyz – Táýelsizdigimiz turǵan kezde biz tek halqymyzǵa ǵana qyzmet eteıik! «Ulym deıtin eli bolmasa, elim deıtin ul qaıdan týady?!» dep Baıtursynov atamyz aıtqandaı, búgingi jas býyn «elim!» dep egilip tursa, Elbasy da, el aǵalary da ondaı perzentine «ulym!» dep emirenip turatyn bolady. Elge qyzmet etý úshin bilim kerek, talmaı bilim alyp, óner úırenińizder, jastar! – dep túıindedi óz sózin Muhtar Abraruly.
Qazaq ulttyq agrarlyq ýnıversıtetinde ótken dáris kezinde Muhtar Qul-Muhammed ǵalymdar men stýdentterdiń saýaldaryna jaýap berip, aýylsharýashylyq salasy ǵylymy ókilderi de jan-jaqty tushymdy pikirlerin ortaǵa saldy.
Qanat ESKENDIR,
«Egemen Qazaqstan»
ALMATY
