Soltústik Qazaqstan oblysynyń ákimi Shvesııa elshisimen kezdesti

PETROPAVL. 7 maýsym. Soltústik Qazaqstan oblysynyń ákimi Erik Sultanov Shvesııanyń Qazaqstandaǵy Tótenshe jáne ókiletti elshisi Hrıstıan Kamıllmen kezdesti. Onymen birge Business Sweden shvesııalyq saýda jáne ınvestısııalyq keńes tóraǵasy Igor Vlasıýk boldy. Bul týraly oblys ákimdiginiń baspasóz qyzmetine silteme jasaǵan egemen.kz tilshisi habarlady. Erik Sultanov respýblıkamyz tartymdy ınvestısııalyq ahýalmen erekshelenetinin, bıznes júrgizý úshin qajetti jaǵdaılar jasalǵanyn jetkizdi. «Soltústik Qazaqstan – agrarly óńir. Biz elimizdegi astyqtyń úshten birin óndiremiz. Qaıta óńdeý salasynda áleýet mol. Iri qytaılyq kompanııanyń qarjy quıýymen maı óńdeý zaýytynyń qurylysy bastaldy. Biz nemis, ıtalıandyq, fınlıandııalyq, qytaılyq jáne reseılik kompanııalarmen jumys isteımiz. Shvesııalyq fırmalarmen de birlesken jobalardy atqarýǵa daıynbyz», – dedi oblys ákimi. О́z kezeginde Hrıstıan Kamıll onyń Qyzyljar óńirine úshinshi jumys sapary ekenin atap ótti. «Bul qazan aıynda bolatyn úlken kezdesý aldyndaǵy ázirlik dep bilemiz. Bizdiń elimiz de soltústikte ornalasqan, kásipkerler til tabysa alady dep oılaımyn», – dedi Shvesııa elshisi. Aıta keteıik, osy jyldyń qazan aıynda Shvesııanyń aýyl sharýashylyǵyn damytý jáne óńirlik damý mınıstri Seen Er Býht bastaǵan delegasııa keledi dep kútilýde. О́mir Esqalı. Derek, foto: Soltústik Qazaqstan oblysy ákimdiginiń baspasóz qyzmeti.