Aqtóbede balalardyń demalýyna jaǵdaı jasalady

AQTО́BE. 7 maýsym. Oblys ákimi Berdibek Saparbaev «Aqbóbek — Vostok» balalardy saýyqtyrý mekemesine bardy. Bul týraly egemen.kz tilshisi habarlady. Ol Aqtóbedegi lagerlerde kórshi aımaqtardan kelgen balalardyń da demalýy kerektigin aıtty. «Aqbóbek» saýyqtyrý ortalyǵynyń quryltaıshysy Kúlparshyn Aıdarhanovanyń aıtýynsha, bul mekeme 16 jyldan beri balalardyń jazǵy demalysyn uıymdastyryp keledi. Osy ýaqyt ishinde lagerde 15 myń bala demalǵan. «Aqbóbek — Vostok» lagerine tıesili aýmaq túnde jaryqtandyrylyp, táýlik boıy kúzetiledi. Jazda alty kezeń boıynsha lager uıymdastyrylyp, ár kezeńde 250 bala demala alady.  Jyl saıyn jaz mezgilinde muǵalimder men stýdentter úshin 50 jumys orny ashylady. Oblys ákimi Berdibek Saparbaev munda oqýshylardyń jazǵy demalysty jaqsy ótkizýi úshin barlyq jaǵdaı jasalǵanyn, lagerge aımaqaralyq kooperasııa aıasynda Batys Qazaqstan, Qyzylorda, Mańǵystaý, Atyraý oblystarynyń oqýshylarynyń da kelip, demalýlary kerektigin atap ótti. Lagerde dári-dármekpen qamtamasyz etilgen medısınalyq blok, kınozal, konsert, sport alańdary, beıneleý óneri, dızaın, ekstrım, doıby-shahmat úıirmeleri bar. 2015 jyly munda aǵashtar men tirekterge ornalastyrylǵan attraksıondar saıabaǵy ashyldy, bıyl saıabaqtyń ekinshi kezeńi iske qosylady. Satybaldy Sáýirbaı. Derek, foto: egemen.kz