Bala satýshylar sot aldyna keldi

Sońǵy jyldary qoǵam óte qaty­gezdenip ketti. Áıtpese, uıattyń bárin jıyp qoıyp, kóldeneń júris júrip tapqan balasyn kókek ana oılanbastan shyryldatyp ájethanaǵa tastar ma edi. Ata-anasynan qymsynbastan jol boıy­na laqtyryp ketetinder de tabylyp jatyr. «Qazannan qaqpaq ketse, ıtten uıat ketedi» degendeı, endi olardyń qata­ryna aq halatty abzal jandar dep a­rdaq­tap júrgen aǵaıyndarymyz da qo­sylyp júr. Esi durys ata-ana baýyr eti balasynan bezbeıdi. Joǵaryda aıtqandaı, kókek analar «eti de, súıegi de sender­diki» dep tastap ketkennen keıin beı­kúná sábı keıbir haram nıettiler úshin jeke basynyń dáýletin arttyratyn baılyqqa aı­nalǵan. Shymkenttegi maman­dan­dyrylǵan aýdanaralyq sotta №1 perınataldyq or­talyqtaǵy atyshýly bala satý oqı­ǵasyna baılanysty sot otyrysy bastaldy. Medısınalyq ortalyqta jasyryn balalar satylyp kelgendigin oblystyq prokýratýra anyqtaǵan bolatyn. Búgin­de qylmysty zertteý materıaldary 46 tomǵa jetti. Dári­gerlerdiń sol mer­­zimge deıin 21 shaqa­laqty saýdaǵa shyǵarǵandyǵy tolyq dáleldengen. Sýdıa Ábınur Qarabaev qarap jatqan sot prosesi jabyq esik jaǵ­daıynda ótýde. О́ıtkeni, ol balalardy búginde asyrap alǵan áke-sheshesi bar. Sot aldynda bala satyp alǵan ata-analar kýálik etýde. Olardyń sany qazir toqsanǵa jetti. Bireý arqa eti arsha, borbaı eti borsha bolyp, bir sábıge zar bolyp júr. Al tastandy balalardy memleket qamqorlyǵyna berýdiń ornyna, keı­bir dárigerler dúkenindegi taýaryn saýda­laǵandaı satýǵa mamandanyp alǵan. Jaqsy otbasyna tússe, qudaıdyń qa­rasqany, al sábı múshelerin donor retinde satatyn qaskóılerdiń qolyna tús­se ne bolmaq?! Oılaýdyń ózi qorqynyshty. Basqa emes, adam janynyń arashasy dep áspetteıtin aq halattylardyń ózi osyn­daı qadamǵa baratyndyǵy qor­qynyshty. Baqtııar TAIJAN, «Egemen Qazaqstan» Ońtústik Qazaqstan oblysy