ASTANA. 8 maýsym. Búgin Astanada Qazaqstan boks federasııasy kýbogy jarysynyń jerebesi tartyldy. Bul týraly egemen.kz tilshisi habarlady.
Jerebeni tartý rásiminde Astana men Almaty qalalarynyń jáne 14 oblystyń komandalary tórt topqa bólindi.
A tobyna Almaty, Shyǵys Qazaqstan, Soltústik Qazaqstan oblystary men Almaty qalasynyń komandasy tústi. V tobynda Mańǵystaý, Jambyl, Pavlodar men Aqtóbe oblystarynyń boksshylary kúsh synassa, S tobyndaǵy jekpe-jekterge Qaraǵandy, Qyzylorda, Qostanaı oblystary men Astana qalasynyń komandasy qatysady. D tobynda Ońtústik Qazaqstan, Aqmola, Atyraý men Batys Qazaqstan oblystarynyń bylǵary qolǵap sheberleri óner kórsetedi.
A tobynyń kezdesýleri Taldyqorǵanda, V tobynyń jekpe-jekteri Aqtaýda ótse, S tobynyń komandalary Qyzylordada, D tobyna túsken oblystardyń jasaqtary Kókshetaýda sharshy alańǵa shyǵady.
8-11 qyrkúıek kúnderi A jáne S, V jáne D tobynda jeńgen komandalar shırek fınalda kezdesedi.
Jarystyń erejesi boıynsha árbir komandada 20 boksshy bolýy tıis. Onyń ishinde 10 boksshy negizgi quramda, 10 bylǵary qolǵap ıesi qosalqy quramda bolady. Komandalar kezdeskende boksshylar 10 jekpe-jek ótkizedi. Eger kezdesý 5:5 esebimen teń aıaqtalsa, qosymsha jekpe-jek ótedi. Onyń qaı salmaqta bolatyny jerebede sheshiledi. Sol kezde A tobynyń komandasy 64 kıloǵa deıingi salmaqtaǵy boksshysyn, V tobynyń jasaǵy 56 kılo, S tobynyń quramasy 81 kıloǵa deıingi, D tobynyń komandasy 69 kıloǵa deıingi salmaqtaǵy ókilin daıyndap qoıýy tıis.
Jarystyń jartylaı fınaly men fınaly 14-15 jeltoqsan kúnderi ótedi. Fınaldyń qaı qalada bolatyny ázirshe belgisiz. Ony keıinirek Qazaqstan boks federasııasy aıtady.
Bıylǵy kýboktyń ıegeri byltyrǵydaı 25 mıllıon teńge alady. Qazaqstan boks federasııasy kýbogynyń jarysy 2010 jyldan beri ótkizilip keledi. Sol jyly Astana qalasynyń komandasy kýboktyń ıegeri atanǵan. 2011 jyly Qaraǵandy oblysy, 2012 jyly Mańǵystaý oblysynyń boksshylary jarystyń jeńimpazy bolsa, 2013 jyly Astana komandasy taǵy da kýbokty basynan asyrǵan. 2014 jyly Jambyl oblysy, al byltyr Ońtústik Qazaqstan oblysynyń jasaǵy alǵash ret kýboktyń ıegeri atandy.
Dastan Kenjalın.
Derek, foto: Qazaqstan boks federasııasy.
