Qazaqstan Respýblıkasy Densaýlyq saqtaý jáne áleýmettik damý mınıstrliginiń buıryǵy  №344

2015 jylǵy 13 mamyr, Astana qalasy Qazaqstan Respýblıkasy azamattarynyń jáne oralmandardyń tegin medısınalyq kómektiń kepildik berilgen kólemin alýyn qamtamasyz etý qaǵıdalaryn bekitý týraly «Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń 2009 jylǵy 18 qyrkúıektegi Kodeksiniń 7-babynyń 1-tarmaǵynyń 77) tarmaqshasyna sáıkes buıyramyn: 1. Qosa berilip otyrǵan Qazaqstan Respýblıkasy azamattarynyń jáne oralmandardyń tegin medısınalyq kómektiń kepildik berilgen kólemin alýyn qamtamasyz etý qaǵıdalary bekitilsin. 2. Qazaqstan Respýblıkasy Densaýlyq saqtaý jáne áleýmettik damý mınıstrliginiń Medısınalyq kómekti uıymdastyrý departamenti: 1) osy buıryqty Qazaqstan Respýblıkasy Ádilet mınıstrliginde memlekettik tirkeýdi; 2) osy buıryqty memlekettik tirkegennen keıin kúntizbelik on kúnniń ishinde merzimdik baspa basylymdarynda jáne Qazaqstan Respýblıkasynyń normatıvtik quqyqtyq aktileriniń «Ádilet» aqparattyq-quqyqtyq júıesinde resmı jarııalaýǵa jiberýdi; 3) osy buıryqty Qazaqstan Respýblıkasy Densaýlyq saqtaý jáne áleýmettik damý mınıstrliginiń ınternet-resýrsynda ornalastyrýdy qamtamasyz etsin. 3. Osy buıryqtyń oryndalýyn baqylaý Qazaqstan Respýblıkasynyń Densaýlyq saqtaý jáne áleýmettik damý vıse-mınıstri A.V. Soıǵa júktelsin. 4. Osy buıryq ony alǵashqy resmı jarııalaǵan kúninen keıin kúntizbelik on kún ótken soń qoldanysqa engiziledi. Mınıstr T.DÚISENOVA Qazaqstan Respýblıkasy Densaýlyq saqtaý jáne áleýmettik damý mınıstriniń 2015 jylǵy 13 mamyrdaǵy №344 buıryǵymen bekitilgen Qazaqstan Respýblıkasy azamattarynyń jáne oralmandardyń tegin medısınalyq kómektiń kepildik berilgen kólemin alýyn qamtamasyz etý qaǵıdalary 1. Jalpy erejeler 1. Osy Azamattardyń jáne oralmandardyń tegin medısınalyq kómektiń kepildik berilgen kólemin alýyn qamtamasyz etý qaǵıdalary Qazaqstan Respýblıkasy azamattarynyń jáne oralmandardyń tegin medısınalyq kómektiń kepildik berilgen kólemin alýyn qamtamasyz etý tártibin aıqyndaıdy. 2. Tegin medısınalyq kómektiń kepildik berilgen kólemi menshik nysanyna qaramastan medısınalyq uıymdarda olardyń lısenzııada aıqyndalatyn qyzmetiniń baǵytyna sáıkes tegin kórsetiledi. 3. Qazaqstan Respýblıkasy Úkimetiniń 2009 jylǵy 15 jeltoqsandaǵy № 2136 qaýlysymen bekitilgen Tegin medı­sınalyq kómektiń kepildik berilgen kóleminiń tizbesine sáıkes tegin medısınalyq kómektiń kepildik berilgen kólemine: 1) jedel medısınalyq kómek pen sanıtarııalyq avıasııa; 2) mynalardy: medısınalyq-sanıtarııalyq alǵashqy kómekti (budan ári - MSAK); medısınalyq-sanıtarııalyq alǵashqy kómek mamanynyń jáne beıindi mamandardyń joldamasy boıynsha konsýltasııalyq-dıagnostıkalyq kómekti (budan ári - KDK) qamtıtyn ambýlatorııalyq-emhanalyq kómek (budan ári - AEK); 3) ýákiletti organ aıqyndaıtyn emdeýge jatqyzý jaǵdaılarynyń josparlanǵan sany sheńberinde - MSAK mamanynyń nemese medısınalyq uıymnyń joldamasy boıynsha, shuǵyl kórsetilimder boıynsha joldamanyń bolýyna qaramastan kórsetiletin stasıonarlyq medısınalyq kómek; 4) medısınalyq uıymnyń medısınalyq-sanıtarııalyq alǵashqy kómek mamanynyń joldamasy boıynsha stasıonardy almastyratyn medısınalyq kómek; 5) qalpyna keltirý emi jáne medısınalyq ońaltý; 6) pallıatıvtik kómek jáne meıirger kútimi kiredi. 2. Qazaqstan Respýblıkasy azamattarynyń jáne oralmandardyń tegin medısınalyq kómektiń kepildik berilgen kólemin alýyn qamtamasyz etý tártibi 4. Jedel medısınalyq kómek (budan ári - JMK): 1) shuǵyl aıǵaqtar boıynsha medısınalyq kómek kórsetýdi; 2) shuǵyl aıǵaqtary boıynsha pasıentterdi medısınalyq uıymdarǵa jetkizýdi; 3) densaýlyq saqtaý salasyndaǵy ýákiletti organmen nemese jergilikti atqarýshy organmen kelisim boıynsha aýdandyq, oblystyq, respýblıkalyq mańyzy bar buqaralyq is-sharalardy (qoǵamdyq, mádenı-buqaralyq, sport jáne basqa) medısınalyq qamtamasyz etýdi qamtıdy. 5. Sanıtarııalyq avıasııa pasıenttiń turǵan jerindegi medısınalyq uıymda medısınalyq jabdyqtyń nemese tıisti biliktiligi bar mamandardyń bolmaýy saldarynan medısınalyq kómek kórsetý múmkin bolmaǵan kezde halyqqa shuǵyl medısınalyq kómek kórsetý úshin beriledi. Sanıtarııalyq avıasııa nysanynda medısınalyq kómek usyný ár túrli kólik túrlerimen bilikti mamandardy mejeli jerge jetkizý ne naýqasty tıisti medısınalyq uıymǵa tasymaldaý jolymen júzege asyrylady. 6. MSAK adam, otbasy jáne qoǵam deńgeıinde kórsetiletin, qoljetimdi medısınalyq qyzmetter keshenin: 1) neǵurlym keń taralǵan aýrýlardy, sondaı-aq jaraqattanýlardy, ýlanýlardy jáne basqa da keıinge qaldyrýǵa bolmaıtyn jaı-kúılerdi dıagnostıkalaý men emdeýdi; 2) ınfeksııalyq aýrýlar oshaqtarynda sanıtarııalyq-epıdemııaǵa qarsy (profılaktıkalyq) is-sharalardy; 3) halyqty gıgıenalyq oqytýdy, otbasyn, anany, ákeni jáne balany qorǵaýdy; 4) halyqty qaýipsiz sýmen jabdyqtaý jáne onyń keneýli tamaqtanýy jónindegi túsindirý jumystaryn qamtıtyn, táýlik boıy medısınalyq baqylaý bolmaıtyn, dárigerge deıingi nemese bilikti medısınalyq kómek túrinde kórsetiledi. MSAK kórsetetin uıymdardyń qyzmeti Qazaqstan Respýblıkasynyń azamattaryna jáne oralmandarǵa medısınalyq uıymdy erkin tańdaý quqyǵy eskerile otyryp, olardyń turǵylyqty jáne (nemese) bekitilgen jeri boıynsha medısınalyq kómektiń qoljetimdiligin qamtamasyz etý maqsatynda aýmaqtyq prınsıp boıynsha qurylady. MSAK-ty ýchaskelik terapevter, pedıatrlar, jalpy praktıka dárigerleri, feldsherler, akýsherler, densaýlyq saqtaý salasy boıynsha áleýmettik qyzmetkerler jáne meıirgerler kórsetedi. Medısınalyq-sanıtarııalyq alǵashqy kómekti uıymdastyrýdy jergilikti memlekettik basqarý organdary júzege asyrady. 7. KDK táýlik boıy medısınalyq baqylaýsyz, mamandandyrylǵan medısınalyq kómek túrinde kersetiledi. Beıindi mamannyń konsýltasııalyq-dıagnostıkalyq kómek kórsetýi MSAK mamanynyń jáne beıindi mamandardyń joldamasy boıynsha júzege asyrylady. 8. Stasıonarlyq kómek táýlik boıy medısınalyq baqylaý jasaı otyryp, bilikti, mamandandyrylǵan jáne joǵary mamandandyrylǵan medısınalyq kómek nysanynda usynylady. Stasıonarlarǵa jatqyzý: 1) MSAK mamanynyń jáne medısınalyq uıymnyń joldamasy boıynsha; 2) JMK jáne sanıtarııalyq avıasııa qyzmeti arqyly; 3) shuǵyl jaǵdaılar kezinde ózderi kelgende júzege asyrylady. 9. Stasıonardy almastyratyn kómek medısınalyq baqylaý jasaı otyryp, dárigerge deıingi, bilikti, mamandandyrylǵan jáne joǵary mamandandyrylǵan medısınalyq kómek túrinde usynylady. 10. Qalpyna keltirý emi jáne medısınalyq ońaltý týa bitken jáne júre kele paıda bolǵan aýrýlardan, sondaı-aq qatty, sozylmaly aýrýlar jáne jaraqattar saldarynan zardap shegetin Qazaqstan Respýblıkasynyń azamattaryna jáne oralmandarǵa kórsetiledi. 11. Adamdarǵa pallıatıvtik kómek jáne meıirgerlik kútim Normatıvtik quqyqtyq aktilerdi memlekettik tirkeý tiziliminde № 10576 bolyp tirkelgen Qazaqstan Respýblıkasy Densaýlyq saqtaý jáne áleýmettik damý mınıstriniń 2015 jylǵy 25 aqpandaǵy № 96 buıryǵymen bekitilgen Halyqtyń pallıatıvtik kómek jáne meıirger kútimi kórsetilýi tıis sanattarynyń tizbesine sáıkes kórsetiledi. 12. Tegin medısınalyq kómektiń kepildik berilgen kólemi sheńberinde dárilik zattarmen qamtamasyz etý: 1) «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksiniń 1-babynyń 1-tarmaǵynyń 33) tarmaqshasynda kózdelgen tártippen densaýlyq saqtaý uıymynyń basshysy bekitken dárilik formýlıarlarǵa sáıkes jedel, stasıonarlyq jáne stasıonardy almastyratyn kómek kórsetý kezinde; 2) Normatıvtik quqyqtyq aktilerdi memlekettik tirkeý tiziliminde № 7306 bolyp tirkelgen Qazaqstan Respýblıkasy Densaýlyq saqtaý mınıstriniń mindetin atqarýshynyń 2011 jylǵy 4 qarashadaǵy № 786 buıryǵymen bekitilgen Belgili bir aýrýlary (jaı-kúıi) bar azamattardyń jekelegen sanattaryn tegin jáne (nemese) jeńildikti qamtamasyz etý úshin Tegin medısınalyq kómektiń kepildik berilgen kólemi sheńberinde ambýlatorııalyq deńgeıde belgili bir (jaı-kúıi) bar halyqty tegin qamtamasyz etý úshin dárilik zattardyń jáne medısınalyq maqsattaǵy buıymdardyń jáne beıimdelgen emdik ónimderdiń tizbesin bekitý týraly» sáıkes ambýlatorııalyq-emhanalyq kómek kórsetý kezinde júzege asyrylady. Buıryq Qazaqstan Respýblıkasynyń Ádilet mınıstrliginde 2015 jylǵy 16 maýsymda Normatıvtik quqyqtyq kesimderdi memlekettik tirkeýdiń tizilimine №11361 bolyp engizildi.