Taýshymyldyq tamyry

Ony qazýshylarǵa tyıym bar ma? Qazir Altaıdyń atqa mingen shaǵy. Taý men saı-sala jasyl jelegin jamylyp, jasanyp tur. Ásirese, Marqakól jaqty aıtsańyzshy!.. Kóńilge kirbiń túsiretini – tumsa tabıǵattyń tamasha tartýynyń qadirin bilmeıtinder áli kóp-aq. Taýdyń sáni de, máni de bolǵan taýshymyldyqqa tóngen qaýip jyldan-jylǵa kóbeımese, azaımaı tur. О́ıtkeni, bul ósimdiktiń ózi de, tamyry da, qyl aıaǵy tomarynda jatatyn qara qurt ta talaı dertke dárý. Sonysyna qaraı sońǵy jyldary taýshymyldyq tamyrynan qara bazarda mıllıonǵa baǵalanatyn qurt izdep, taýdyń bar qolatyndaǵy gúldi aqtaryp tastaıtyn júgensiz júgermekter qaptap ketti. Jýyrda «Mohnatka» telimindegi Terekti aýylynyń 20 jasar turǵyny taýshymyldyqtyń tamyryn zańsyz qazyp jatqan jerinen ustaldy. Oblystyq ishki ister departamentiniń habarlaýynsha, «Ohotzooprom» mekemesiniń qyzmetkerleri Kúrshim aýdanynda reıd júrgizý barysynda ustalǵan terektilik azamattan elimizdiń «Qyzyl kitabyna» engen taýshymyldyqtyń 35 túbi tárkilengen. Polısııa qyzmetkerleri atalǵan aıǵaq boıynsha Qylmystyq kodekstiń 339-babynda qarastyrylǵan (joǵalý qaýpi bar jáne sırek kezdesetin ósimdik túrlerin zańsyz alý boıynsha) qylmystyq is qozǵady. Bul – «men urlyq qylǵanda aı jaryq boldy» dep, ilýde bireýdiń tutylǵany ǵoı. Áıtpese, júrdek motosıklimen ormanshyǵa da, qoryqshyǵa da shań qaptyryp ketetin qýlar qansha gúldiń obalyna qaldy deseńizshi?.. Dýman ANASh, «Egemen Qazaqstan» Shyǵys Qazaqstan oblysy, Kúrshim aýdany