Aǵash egý isine úlesimizdi qosyp, tabıǵı baılyqtarymyzdy aıalaıyq

Memleket basshysy Nur­sultan Nazarbaev As­tana­nyń «jasyl aımaǵynyń» damý barysymen tanysty, dep habarlady Prezıdenttiń baspasóz qyzmeti. Nursultan Nazarbaev elor­danyń orman plantasııalaryn jáne «Aq qaıyń» kóshetter pı­tomnıgin aralady. Sońynan dás­túrli qyr­ǵaýyl ushyrý sharasyna qatysty. Budan bólek, Memleket bas­shysyna aǵash otyrǵy­zy­latyn aýmaqtyń jalpy kólemin ul­ǵaı­tý jumys­tarynyń barysy, sondaı-aq, 2018 jylǵa deıingi jasyl jelekti alap pen onyń bıoalýandylyǵyn damytý jospary týraly baıandaldy. Sondaı-aq, Qazaqstan Pre­­zı­denti buqaralyq aqpa­rat qural­da­ry ókilderi úshin brıfıng ótkizdi. Elbasy Astana mańyn­daǵy jasyl jelek orman sharýashylyǵy qyzmetkerleri men ǵalymdardyń tynymsyz eńbeginiń arqasynda paıda bolǵanyn atap ótti. – Jyldar boıǵy egilgen aǵashtardyń jalpy aýmaǵy 73 myń gektar boldy, jyl saıyn qosymsha 5 myń gektar aǵash otyr­ǵyzylady. Bul aýmaq kólemi jóninen Býrabaı ulttyq saıa­ba­ǵyna teń. Bizdiń endigi minde­timiz – elorda mańyndaǵy orman aǵashtary alabyn Býrabaı saıabaǵy aımaǵyna ulastyrý, – dedi Nursultan Nazarbaev. Qazaqstan Prezıdenti eli­mizdiń ekologııalyq jaǵ­daıyn jaqsartý úshin barlyq óńirde orman ósirý isin damytý qajettigine de nazar aýdardy. – Osy jyldary jańa elorda – Astana ǵana emes, sony­men qa­tar, «ekinshi Býra­baı» boı kóterdi. Buǵan deıin munyń biri de bolmaǵan. En dalada jańa qala boı kóte­rýmen birge, onyń mańyn­da «jasyl aımaq» ta paıda bol­dy. Sonyń arqasynda qalada shań-tozań men uıytqyǵan jel de azaıdy. Bul ormandarda jemis-jıdekterdiń alýan túri ósedi, jan-janýar álemi paıda boldy, – dedi Elbasy. Sońynda Memleket bas­shysy elimizdiń barsha aza­mattaryn aǵash egý isine óz úlesterin qo­sýǵa, Qazaq­stannyń tabıǵı baı­lyqtaryn aıalaýǵa shaqyrdy. Astana mańynda aǵash otyr­ǵy­zylǵan aýmaqtyń jalpy kólemi 73 myńnan astam gektardy qamtıdy. Bolashaqta elordanyń «jasyl aımaǵyn» Aqmola oblysynyń Aqkól aýdany ormandarymen ush­tas­tyrý josparlanýda. Budan bólek, qalanyń «jasyl aımaǵynda» týrızm men dem­alys oryndaryn damytý maqsatymen 2014 jyly «Ja­syl Aımaq» Qyzyljar orman sharýashylyǵy aýma­ǵynda safarı-saıabaǵy qu­ryldy. 2015 jyly jabaıy jan-janýarlar túri men sanyn kóbeıte otyryp, saıabaq aýmaǵyn 300 gektarǵa deıin keńeıtý jóninde joba ázirlendi.