Atalǵan marafon bıyl toǵyzynshy ret uıymdastyrylyp otyr. Jyl saıyn qatysýshylar geografııasy keńeıip keledi. Bıyl jarysqa 821 sheteldik sportshy (jalpy sanynyń shamamen 8%-y) arnaıy qatysý úshin Almatyǵa keldi.
Eń kóp qatysqan elderdiń úshtigi: Reseı (346), Qyrǵyzstan (146) jáne О́zbekstan (81). Sonymen qatar Qytaı (37), AQSh (32), Ulybrıtanııa (28), Ýkraına (21) jáne Belarýs (18) elderinen de qatysýshylar boldy. Bul doda Azııa, Eýropa, Soltústik jáne Ońtústik Amerıka, Afrıka men Taıaý Shyǵys elderinen kelgen jelaıaqtardy biriktirip, Almatynyń halyqaralyq júgirý kartasyndaǵy mańyzdy ortalyq ekenin taǵy bir márte dáleldedi.
«Sporttyq týrızm – qalany halyqaralyq deńgeıde tanytýdyń eń tıimdi quraldarynyń biri. Sondaı-aq, júgirýshiler kóbine jalǵyz kelmeıdi: olarmen birge otbasy músheleri men dostary da keledi, bul óz kezeginde týrıster sanyn arttyrady. Kóptegen sheteldik qonaq úshin bul jarys Qazaqstanmen alǵashqy tanystyqqa aınalyp, qaıta oralýǵa sebep bolady. Bizdiń zertteýimizge sáıkes, basqa qalalardan jáne shetelden kelgen qatysýshylardyń 79,3%-y Almatyǵa qaıta kelýdi josparlap otyr. Bul jańa saparlar men qalanyń ınvestısııalyq tartymdylyǵynyń artýyn bildiredi», dedi «Birinshi bolý − batyldyq» korporatıvtik qory qamqorshylyq keńesiniń tóraǵasy Ǵalymjan Esenov.
Uıymdastyrýshylar ekologııalyq talaptarǵa erekshe nazar aýdarǵan. EcoNetwork seriktesi márede ınteraktıvti ekologııalyq aımaq uıymdastyryp, jarys baǵyty boıynda plastık qaldyqtardy jınaýdy qamtamasyz etti. Jınalǵan qaldyqtardyń barlyǵy qaıta óńdeýge jiberiledi.
Sondaı-aq, sóre aldynda qatysýshylar qajetsiz, biraq jaramdy qalyń kıimderin qaldyrdy. «Jylý» jobasynyń komandasy olardy jınap, suryptap, muqtaj jandarǵa jetkizdi.
Aıta keteıik, 31 mamyr kúni ótetin Astana Half Marathon jarysyna tirkelý jalǵasyp jatyr. Bul is-shara elimizdiń túkpir-túkpirinen júgirý áýesqoılaryn biriktiredi.
Sonymen qatar 2026 jyly 27 qyrkúıekte ótetin 15-shi mereıtoılyq Almaty Marathon-ǵa da tirkelý ashyq. Bul Ortalyq Azııadaǵy eń iri júgirý jarysy bolmaq.
