Atalǵan tazalyq jumystary men tal egýge memlekettik mekemeler, jeke uıymdar men dinı birlestikterdiń músheleri, jastar, volonterlik jáne úkimettik emes uıymdar, sondaı-aq eko belsendiler qatysty. Atalǵan aýqymdy senbilikte oblys ákiminiń orynbasary Ǵanı Maılybaev tazalyq aksııasynyń taǵylymdy shara ekenin eske saldy.
«Tabıǵaty tańǵajaıyp Ile ózeniniń jaǵasyndaǵy «Kóshpendiler» qalashyǵy alda kórnekti týrıstik nysanǵa aınalmaq. Sondyqtan bula aýmaqta kelýshilerge jaıly orta jasaý úshin munda ekopark salynbaq. Bul qadam óńirimizdiń týrıstik áleýetine tyń serpin beredi dep oılaımyn. Búgin sol ıgi bastamaǵa ún qosý úshin jınaldyq», dedi Ǵanı Aıdaruly.
300-ge jýyq adam qatysqan sharada «Kóshpendiler» qalashyǵy mańyna 500 túp aǵash egilip, Ile ózeniniń boıy tazalandy. Ekologııalyq aksııaǵa qatysýshylar tabıǵatty aıalap, qorshaǵan ortany taza ustaý – adam balasyna júktelgen mindet ekenin aıtty.
Oblys ákimdiginiń málimetine súıener bolsaq, aımaq aýmaǵyndaǵy senbilikke 32000-ǵa jýyq adam qatysyp, 225 tehnıka jumyldyryldy. Senbilik qorytyndysy boıynsha 264 tonna qoqys shyǵarylyp, 17800 túp aǵash otyrǵyzyldy.
