Jergilikti ákimdiktiń habarlaýynsha, Saıótes pen jetinshi razezd arasyndaǵy, aýdan ortalyǵynan 120-150 shaqyrym qashyqtyqta ornalasqan aýmaqta jylqylardyń qyrylý derekteri anyqtalǵan. Bul týraly alǵash bolyp áleýmettik jelilerde malynan aıyrylǵan jergilikti turǵyndar habarlaǵan.
Jaǵdaıdy baǵalaý úshin memlekettik organdar ókilderiniń qatysýymen arnaıy komıssııa quryldy.
«Komıssııa sharýa qojalyqtarynyń ıelerimen birlesip jumysty jalǵastyryp jatyr. Aýyl sharýashylyǵy janýarlaryn sáıkestendirý bazasynda tirkelgen qyrylǵan malǵa ótemaqy tóleý máselesi qoldanystaǵy zańnama aıasynda qaralady. Sheshimdi tótenshe jaǵdaılar, aýyl sharýashylyǵy jáne veterınarııa salasyndaǵy ýákiletti organdar qabyldaıdy», dep habarlady aýdandyq ishki saıasat bólimi.
Jergilikti atqarýshy organdar qyrylǵan maldyń naqty sanyn anyqtap jatyr, óıtkeni mal ıeleri ázirge tolyq esep júrgize almaı otyr.
Jylqylar qatty jel men nóser jańbyr saldarynan qyrylǵan. Jedel áreket etý úshin Beıneý aýdanynan Aqshymyraý aýylyna «Trekol» jol talǵamaıtyn kóligi jiberildi, joǵalǵan maldy izdeý úshin drondar arqyly áýeden baqylaý uıymdastyryldy. Oblystyq aýyl sharýashylyǵy jáne jer qatynastary basqarmasynyń basshysy Mańǵystaý aýdanynda bolyp, turǵyndarmen kezdesýler ótkizip, barlyq qajetti jumystardy úılestirip jatyr.
«Oqıǵanyń saldaryn joıý úshin barlyq kúsh pen qural jumyldyryldy. Sýdy sorý jáne qalpyna keltirý jumystary kúsheıtilgen rejımde jalǵasady. Jaǵdaı erekshe baqylaýda», dep habarlady Mańǵystaý aýdany ákimdigi.
