Elbasy Nursultan Nazarbaev Astana qalasyndaǵy ortalyq saıabaqta boldy, dep habarlady Prezıdenttiń baspasóz qyzmeti.
Memleket basshysy saıabaqtyń ınfraqurylymymen tanysyp, jańadan ashylǵan jaǵajaı aımaǵyn kórdi.
Sondaı-aq, Nursultan Nazarbaev elektromobılmen qoǵamdyq demalys aımaqtaryn aralap shyǵyp, elorda turǵyndarymen áńgimelesti.
Qazaqstan Prezıdenti qalalyqtardyń jappaı, belsendi jáne mazmundy demalysy úshin barynsha qolaıly jaǵdaılar jasaýdyń mańyzdylyǵyn atap ótti. Memleket basshysynyń aıtýynsha, mádenı-saýyq qyzmetterin sapaly uıymdastyrý jastardyń, ásirese, jaz mezgilindegi ýaqytyn paıdaly ótkizýine septigin tıgizedi.
Sonymen qatar, Memleket basshysy áýesqoı jasóspirim balýandardyń beldesýi ótip jatqan saıabaqtyń sport alańynda boldy.
* * *
Qalanyń ortalyq saıabaǵynyń ınfraqurylymyn jetildirý jumystary aıasynda attraksıondar ornatý jumysy júrgizilip, sporttyq jáne eresekter men balalarǵa arnalǵan basseınderi bar zamanaýı jaǵajaı aımaǵy ashyldy. Sondaı-aq, jattyǵý alańy, shańǵy rollerine arnal-
ǵan uzyndyǵy 3,8 shaqyrym trassasy bar dene shynyqtyrý jáne saýyqtyrý aımaǵy ashylǵan. Saıabaq aýmaǵyndaǵy saýda nysandary shahardyń arhıtektýralyq stılimen úılestirildi.
Munda kún saıyn klassıkalyq jáne tanymal mýzyka konsertteri, taza aýada buqaralyq sportpen aınalysý sekildi mádenı-kópshilik jáne sport sharalary ótedi. Jańǵyrtý jumystary nátıjesinde saıabaqqa kelýshiler sany jumys kúnderi 3 myńǵa deıin, al demalys kúnderi 10 myńǵa deıin kóbeıdi.
