Astana. «Altyn belgi». Aq arman

Taıaýda qalanyń ortalyq alańynda Astana ákimi Ádilbek Jaqsybekov Biryńǵaı ulttyq testileýdiń qorytyndysy boıynsha óz bilimin rastaǵan 132 elordalyq túlekke «Altyn belgi» tósbelgilerin tabys etti. Dástúrli sharaǵa Parlament pen qalalyq máslıhat depýtattary, Bilim jáne ǵylym mınıstrliginiń ókilderi, sondaı-aq, muǵalimder men ata-analar qatysty. Elorda basshysy túlekterdi aıtýly oqıǵamen quttyqtap, jastarǵa bolashaqta budan da úlken jetistikter kútip turǵanyn aıtty. «Qazirgi kezde senderdiń mindetteriń – ómirlik jolda tirek bolatyn, ózderiń úshin senimdi serik bolatyn kásipti tańdaý», – dedi Á.Jaqsybekov. Odan ári ákim Memleket basshysynyń bilim máselelerine basa nazar aýdaratynyn atap ótti. «Búgingi tańda memleket bilim alý úshin barlyq jaǵdaılardy jasap otyr: elimizdiń jetekshi JOO-nyń esikteri sender úshin aıqara ashyq, úzdik pedagogtar jumys istep, bilim berý granttarynyń sany ulǵaıtyldy, stıpendııa ósip, álemdik deńgeıdegi ýnıversıtet – «Nazarbaev Ýnıver­sıtet» quryl­dy, «Bolashaq» baǵdarlamasy jú­zege asyrylýda», dedi elorda ákimi. Qala basshysy balalardy oqy­typ, ár oqýshyny bilim nárimen sýsyndatqan ustazdar qaýymyna erekshe al­ǵysyn bildirdi. Elordalyq mektepter túlekterge myqty bilim bazasyn qalyptastyryp, olardyń boıyna rýhanı-adamgershilik baǵdar berip, jastardy eresek ómirge daıyndaıdy. Astanada bilim salasynda qolaıly jaǵdaı jasalǵan. Jalpy bilim beretin mektepter sany jyl saıyn artyp keledi. О́tken jyly 7100 oryndyq 6 mektep ashylyp, úsh aýysymdyq oqýdy tolyǵymen joıýǵa qol jetkizildi. Atqarylǵan jumystardyń nátıjesinde bilim sapasy artyp keledi. 2016 jyly «Altyn belgi» ıesi atanǵan elordalyq túlekterdiń sany ótken jylmen salystyrǵanda 112-den 132-ge, UBT boıynsha ortasha ball 86,6-dan 89,2 ballǵa ósti. Elordalyq oqýshylar halyqaralyq olımpıadalar men ǵylymı jobalarda júldeli oryndar ıelenýde. О́tken jyly olar AQSh, Brazılııa, Grýzııa, Ońtústik Koreıa, Reseı memleketterinde ótken jarystardan 268 medal ıelenip qaıtty. Aıta keteıik, Astanada 2015-2016 jylǵy oqý jylynyń qorytyndysy boıynsha 4695 túlek attestat alady, sonyń ishinde, 54-i erekshe úlgidegi attestattar. Qala ákimi túlekterge aq jol tilep, alǵan bilimdi ómirde tıimdi paıdalanýǵa shaqyrdy. Saltanatty marapattaý rásimi aıaqtalǵan soń «Altyn belgi» tósbelgileriniń ıegerleri dástúrli mektep valsin bılep, aspanǵa túlekterdiń tilekteri jazylǵan sharlar ushyryldy. Túlekterdi qazaqstandyq estrada ónerpazdary quttyqtady. Ulan SANJAR