Shaqalaqqa ómir syılaǵan

Aqtaýda esimi halyq arasynda yqylaspen aıtylatyn sanaýly dárigerlerdiń biri – oblystyq balalar aýrýhanasynyń hırýrgi Qurman Qaıranov. О́z atyna aıtylatyn jyly lebizderge dálel syndy Qurman budan jarty jyl buryn óte aýyr ota jasap, jańa týǵan náresteniń óńesh biteýligin ashyp berdi. Muny adam óńeshiniń ózara jalǵaspaǵan eki bólikke bólinýi dep túsindirýge bolady, mundaı jaǵdaıda adam as qabyldaı almaı, ashtyqtan ólip ketetini anyqtalǵan. Demek, 18 jyldyq tájirıbesi bar ol Mańǵystaýda óńesh biteýligin ekonoskopııalyq jolmen ashqan alǵashqy hırýrg. Ota barysynda Q.Qaıranov oblystyq perınataldyq ortalyqtyń hırýrg-gınekologtarynyń kómegi­men balanyń keýde jasýshasyn ashpaı, óńeshtiń eki soqyr ushyn biriktirdi. Al, bul úshin Qurman aldyn ala sımýlıasııalyq zalda, arnaıy satyp alynǵan maldyń ishek-qarnymen qolyn jattyqtyryp, daıyndalǵan. Hırýrg bolsa, mundaı kúrdeli otany kóptegen balalardyń kótere almaıtyndyǵyn, sondyqtan otany bala ómirge kelgen soń alǵashqy táýlikterde jasaǵan jón ekendigin aıtqan. Sondaı-aq, ol óz aldyna barlyq otany laparoskopııalyq ádiske aýystyryp jasaýdy mindet etip otyr. Qazirgi tańda Mańǵystaý oblysy bala týý kórsetkishi boıynsha respýblıkada birinshi orynda, óńirde jylyna 8 myńdaı náreste dúnıege keledi. Biraq, olardyń arasynan damýynda aqaý bar balalar da kezdesedi, sondyqtan perınataldyq ortalyqta ashylǵan neonataldy hırýrgııada eki jylda 50 ota jasalǵan. Qazir jaǵdaıy biraz jaqsarǵan kishkentaı Turarbektiń anasy ulynyń óskende Qurman aǵasy syndy hırýrg bolyp, jurtqa jaqsylyq syılaǵanyn qalaıdy eken. Durys-aq. Bolsyn deımiz. О́ıtkeni, Mańǵystaýdyń maqtaýly dárigeri retinde áriptesteriniń mereıin ósirip, salanyń sańlaǵy sanalǵan Qurman Qaıranovtaı óz isiniń sheberi, bilikti dárigerler kóp emes jáne qoly altyn dárigerler halyqqa qashanda kerek. Gúlaıym ShYNTEMIRQYZY, «Egemen Qazaqstan» Mańǵystaý oblysy