Túlekter men tilekter

Qaraǵandyda daryndy jastarǵa qurmet kórsetildi Kenshiler astanasynda oblystaǵy daryndy balalardyń basyn qosqan túlekter toıy ótti. «Arısta» meıramhanasynda uıymdastyrylǵan bul saltanatqa eń úzdik túlekter, jalpy bilim berý pánderi boıynsha halyqaralyq jáne respýblıkalyq konkýrstardyń, ǵylymı jobalar men olımpıadalardyń  jeńimpazdary men júldegerleri, barlyǵy 200-ge tarta alǵadaı jas qatysty. Arýlar aq kóılek, bozbalalar syptaı bolyp smokıng kıgen keshke oblys ákimi Nurmuhambet Ábdibekov te qatysyp, jastarǵa aq tilekke toly quttyqtaý sózin arnady. «Sizder mektepti Qazaqstan Res­pýb­lıkasy Táýelsizdiginiń 25 jyl­dyǵy qarsańynda bitirip otyrsyzdar. Tarıh úshin bul qas-qaǵym sát shyǵar, al bizdiń ómirimizde bul bıik beles, – dedi óńir basshysy. –  Siz­derdiń jarqyn bolashaqtaryńyzdan mol úmit kútemiz. Jastarymyzdyń qabiletti, talantty, aqyldy jáne armanshyl ekendigine degen senimimiz mol. Sizderdiń batyldyqtaryńyz ben óner tapqysh qasıetterińiz, shy­ǵarmashylyq qabiletterińiz ben ómirdi jaqsy jaqqa qaraı ózgertýge degen qulshynystaryńyz árqaısyńyzdyń laıyqty da qamsyz bolashaqtaryńyzdy qamtamasyz etetini sózsiz. Bar­lyqtaryńyzǵa belsendi ómirlik us­tanymy bar, elimizdiń naǵyz patrıo­ty jáne adal azamaty bolý baqytyn tileımin!». Bıyl oblysta 121 túlek «Altyn belgi» belgisiniń ıegeri boldy. Solardyń ishinde Jezqazǵandaǵy qazaq-túrik lıseıiniń túlegi Tilepbergen Ábishev jaqynda ótken Ulttyq biryńǵaı testileý synaǵynda eń joǵary kórsetkishke qol jetkizip, 125 upaı jınaǵan bolatyn. Oblys basshysy daryndy bozbalaǵa arnaıy medalǵa qosa Eýropa qalalaryna saıahat jasaýǵa múmkindik beretin tamasha tartý – sertıfıkatty saltanatty túrde tabys etti. Sonymen qatar, halyqaralyq olımpıa­dalar men jarystardyń jeńimpazdaryna «Jas dara» medaldary tapsyryldy. Mysaly hımııa páni boıynsha Máskeýde ótken halyqaralyq olımpıadanyń eki dúrkin jeńimpazy Tıishkúl Muratqa oblys ákimi arnaıy syılyq – «Otan» qol saǵatyn syıǵa tartty. Túlekter keshinde mektepti kelesi jyly bitiretin daryndy balalarǵa da táýelsizdik pen beıbitshilikti jáne kelisim men damýdy beıneleıtin «Ama­nat» músinsheleri tabys etildi. Olardyń ata-analary da Alǵys hattaryna ıe boldy. Budan basqa, osy keshke qatysqan túlekterdiń barlyǵyna sporttyq qural-saıman alýǵa múmkindik beretin arnaıy sertıfıkattar syıǵa tartyldy.  Aıta ketetin jaıt, bıyl oblystyń oza shapqan  túlekteri L.N.Gýmılev atyndaǵy Eýrazııa ulttyq ýnıversıtetiniń, Sú­leımen Demırel atyndaǵy ýnıver­sı­tet­tiń, Qaraǵandy memlekettik tehnı­ka­lyq ýnıversıtetiniń, Qaraǵandy medısınalyq ýnıversıtetiniń, Fontys (Gol­­landııa), Solfridge, Unist (Ońtústik Koreıa), Yale Univesity, Rıý Heıven, Kon­nektıkýt (AQSh) jáne  M.V.Lomonosov atyn­daǵy Máskeý memlekettik ýnı­ver­sıteti syndy sheteldik joǵary oqý or­yn­­darynyń granttaryn jeńip alǵan bolatyn. Keshtiń resmı bólimi támam bolǵannan keıin kezek merekelik konsertke kelip, júzderi baqyttan balbul janǵan órender óner maıtalmandarynyń  oryndaýyndaǵy ásem ánderdi tyńdap jáne juptasyp vals bıin bıledi. Qaırat ÁBILDINOV, «Egemen Qazaqstan» QARAǴANDY