«Qazaqstan barysy-2016». Týrnırdiń júlde qory – 42 mln. teńge

Búgin Astanada  «Qazaqstan barysy» týrnırine arnalǵan jıynda «Qazaqstan barysy» qazaq kúresin damytý qory qamqorshylar keńesiniń tóraǵasy Arman Shoraev atalǵan jarystyń júlde qorynyń 42 mln. teńge bolatynyn, al týrnırdiń jeńimpazyna 25 mln. teńge, jeńil avtokólik pen Astanadan páter beriletinin aıtty. «Sońǵy kezderi ózderińiz biletindeı, qarjylyq daǵdarys búkil álemde bolyp jatyr. Elimizdiń ekonomıkalyq jaǵdaıy da jarystardy kóptep ótkizip, júlde qoryn kóbeıtýge qol baılaý bolyp tur. Soǵan qaramastan bıylǵy týrnırdi laıyqty ótkizý úshin bar kúshimizdi salyp, Samuryq-Qazyna» ál-aýqat qorynyń arqasynda júlde qoryn 42 mln. teńgege jetkizip otyrmyz. Onymen qosa týrnırdiń jeńimpazyna aqshalaı syılyq, avtokólikpen birge Astanadan páter beriledi», dedi ol. «Qazaqstan barysy-2016» týrnıriniń fınaly 3 shilde kúni «Saryarqa» velotreginde ótedi. Kórermender arasynda avtokólik oınatylady. Balýandar jarysyn ««KazSport»» arnasy, Túrkııanyń «TRT Avaz» arnasy men Reseıdiń «Match! Boes» telearnasy tikeleı efırden kórsetedi. Dastan Kenjalın. Foto: avtor.