Innovasııa ınvestısııamen ıgerilmek

Keshe Prezıdent janyndaǵy Ortalyq kommýnıkasııalar qyzmetinde ótken kezekti baspasóz máslıhatynda Qazaqstan ekonomıkasynyń jańa salalaryn qalyptastyrýda «Innovasııalyq tehnologııalar parki» derbes klasterlik qory qyzmetiniń úlesi jaıynda áńgime qozǵaldy. Baspasóz máslıhatyna «Innovasııalyq tehnologııalar parki» derbes klasterlik qorynyń bas dırektory Sanjar Kettebekov, quqyqtyq máseleler jónindegi basqarýshy dırektory Aıgerim Kaıýpova jáne «McKinsey&Company, Inc. Kazakhstan» fılıalynyń basshysy Iýkka Maksımaınen qatysty. «Innovasııalyq tehnologııalar parki» derbes klasterlik qory ótken jyldyń sáýir aıynda qurylǵan bolatyn. Bul «100 naqty qadam» Ult Josparynyń 63-qadamy aıasynda iske asyrylýda. Qazirgi tańda «Innovasııalyq tehnologııalar parki» derbes klasterlik qory eki iri jobany qolǵa alyp otyr. Atap aıtqanda, birinshisi – sheteldik úzdik bıznes-kompanııalarmen birlesip tehnologııalyq damý ortalyqtaryn iske qosý. Ekinshisi – joǵary tehnologııalyq eýrazııalyq startap-hab qurýdy maqsat etken «Startap Qazaqstan» baǵdarlamasyn iske asyrý. «Innovasııalyq tehnologııalar parki» el óndirisiniń basym salalarynda joǵary teh­nologııalyq óndiristi damytý jáne álemdik teh­­nologııalyq trendterge sáıkes ulttyq ekono­mıkany ártaraptandyrý úshin jańa baǵyt­tardy qalyptastyrady. Soǵan oraı elde ashyq ǵylymı-tehnologııalyq platforma qurady. «ITP» DKQ kommersııalyq emes, derbes uıym mártebesine ıe jáne «Innovasııalyq tehnologııalar parki» arnaıy ekonomıkalyq aımaǵynyń basqarý organy bolyp tabylady. Bul, sondaı-aq, Almaty Tech Garden brendi aıasynda jetekshi joǵary oqý oryndary men ǵylymı-zertteý ınstıtýttarynyń jáne «ITP» arnaıy ekonomıkalyq aımaǵyna kir­e­tin kompanııalardyń ǵylymı-tehnıkalyq bazasyn shoǵyrlandyrady. Qazirgi ýaqytta, «ITP» arnaıy ekonomıkalyq aımaǵynda 150-ge jýyq kompanııa tirkelgen, onyń ishinde shetelmen seriktes kompanııalar da bar. «Innovasııalyq tehnologııalar parki» negizinen elge ınvestısııa tartý arqyly ınnovasııany ıgerýge úles qosady. Máselen, búginde onda transulttyq kompanııalarmen birlese keminde 50 paıyzdyq ınvestısııamen 5 tehnologııa ortalyǵyn qurý qolǵa alynǵan. Transulttyq kompanııalar úshin bul birinshi kezekte dástúrli jáne jańa baǵyttardyń negizinde ozyq tehnologııalardy tartý úshin synaq alańy bolyp tabylady» dedi Qordyń bas dırektory S.Kettebekov. Brıfıng barysynda, sonymen qatar, «ITP» DKQ jáne «McKinsey & Co» kompanııa­sy arasyndaǵy yntymaqtastyq aıasynda taý-ken metallýrgııalyq kesheni boıynsha Qu­zyret ortalyǵy qurylatyny aıtyldy. Ol osy jyldyń ekinshi jartysynda Almaty qalasynda ashylady dep josparlanǵan. Ortalyq jańa tehnologııalar boıynsha jylyna 1200-ge deıin mamandardy oqytady, sonymen qatar, basqa da tehnologııalyq múmkindikterge arnalǵan alań bolmaq. Sondaı-aq, bıyl «Google» kompanııasyn tarta otyryp, avtomattandyrý boıynsha 4 modýldiń birin iske qosý josparlanyp otyr. «Innovasııalyq tehnologııalar parki» derbes klasterlik qory qyzmetiniń ekinshi baǵyty – «Startup Kazakhstan» baǵdarlamasy Qazaqstan Respýblıkasynyń Investısııalar jáne damý mınıstrliginiń ınnovasııalyq saıasatynyń bir bóligi bolyp tabylady. Sonymen qatar, ol Indýstrııalandyrý baǵdarlamasynyń ekinshi bes jyldyǵy jáne «Digital Kazakhstan» baǵdarlamasynyń aıasynda júzege asyrylýda. Baǵdarlamanyń maqsaty – «Jibek joly» aıasynda birikken EEQ, Kaspıı basseıni men Azııa elderiniń perspektıvti naryqtarynda jumys isteı alatyn joǵary eksporttyq áleýeti bar joǵary tehnologııalyq kompanııalardy qalyptastyrý, sondaı-aq, úzdik ınnovasııalyq jobalardy shoǵyrlandyrý. Dınara BITIKOVA, «Egemen Qazaqstan»