Qaraǵandy qalasynda kómirdi baıytýmen aınalysatyn jańa fabrıka ashyldy. Kásiporynnyń quryltaıshylarynyń biri áıgili boksshy Gennadıı Golovkın. Bylǵary qolǵap sheberi oblys ákimi Nurmuhambet Ábdibekovpen birge óndiris oshaǵynyń ashylý saltanatyna qatysty.
Jańa kásiporynnyń qalypty jumys isteýin «KAZ Ferrıt» JShS qadaǵalaıtyn bolady. Fabrıka eski qalanyń mańynda, burynǵy tramvaı deposy ornalasqan jerde oryn tepken.
Fabrıkanyń tusaýy kesilgen soń Gennadıı Golovkın jýrnalısterge qysqasha suhbat berdi. Ataqty sportshy áńgime barysynda kásiporynǵa qansha ınvestısııa salǵanyn ashyp aıtpady. «Túzde tapqan tabystyń bárin úıge ákeldik. Jarǵylyq kapıtalǵa salǵan aqshanyń mólsherin aıta almaımyn. Al kásiporynnyń baqylaý paketi meniń qolymda», – dedi kenshiniń balasy G.Golovkın.
Jańadan ashylǵan kásiporynda Qaraǵandy men Ekibastuzdyń kómiri baıytylatyn bolady. Fabrıkanyń qýaty jylyna 500 myń tonna kómirge dep josparlanǵan. Bul jerde bolashaqta 150 adam turaqty túrde jumys isteıtin bolady.
Fabrıka quryltaıshylarynyń qatarynda G.Golovkınnen basqa «KAZ Ferrıt» JShS men «Samuryq-Qazyna» ulttyq ál-aýqat qory bar.
Kásiporyn quryltaıshylarynyń aıtýynsha, jańa fabrıkanyń basym baǵyttaǵy mindetiniń biri qorshaǵan ortany qorǵaý men ekologııany saqtaýǵa erekshe kóńil bólý bolmaq.
Qaırat ÁBILDINOV,
«Egemen Qazaqstan»QARAǴANDY
