Memorandýmǵa qol qoıdy

«Nur Otan» partııasy «Atameken» ulttyq kásipkerler palatasymen kásipkerlikti damytý jáne bıznes múddesin qorǵaý jónindegi júıeli qarym-qatynas ornatý týraly kelisimdi bekitti. О́za­ra yntymaqtastyq jónin­degi memorandýmǵa «Nur Otan» partııasy Tóraǵasy­nyń birinshi orynbasary Muh­tar Qul-Muhammed pen «Ata­me­ken» Ulttyq kásipker­ler pala­tasynyń Basqar­ma tóra­ǵasy Abylaı Myrzah­metov qol qoıdy. Qujat otandyq kásipkerliktegi básekelestikti arttyrý boıynsha birlesken jáne kelisilgen áreketterdi júzege asyrý barysynda ózara qoldaý men belsendi yntymaqtastyqpen qamtamasyz etýdi kózdeıdi. Sondaı-aq, bız­nes-bastamalardy oryndaý úshin qolaıly quqyqtyq, ekonomı­kalyq jáne áleýmettik jaǵdaı qalyptastyrý da maqsat etiledi. Jıynǵa jetekshilik etken Muhtar Qul-Muhammed Memleket basshysynyń 2050 jylǵa deıingi Qazaqstannyń damý strategııa­synda kórsetip bergen basty tapsyrmalarynyń biri – elimizdiń IJО́-degi shaǵyn jáne orta bıznestiń úlesin 50 paıyzǵa deıin arttyrý bolyp tabylatyndyǵyn atap ótti. «Partııamyzdyń kóshbasshysy aıqyndap bergen álemniń damyǵan 30 memleketiniń qataryna qosylý jónindegi bıik maqsattarǵa qol jetkizý úshin kásipkerlerdiń jumys isteýine meılinshe qolaıly jaǵdaı jasaýymyz kerek. Bul kúrdeli iste «Nur Otan» partııasy mańyzdy ról atqarýy tıis. Biz otandyq kásipkerlerge jedel jáne tıimdi kómek kórsetý úshin ortalyq pen óńirlerdegi barlyq resýrstardy iske qosamyz. О́ıtkeni, kásipkerlik – órkendegen ekonomıkanyń negizi», – dedi Muhtar Abraruly. Aıta keteıik, «Nur Otan» partııasy óziniń «Qazaqstan–2021: Birlik. Turaqtylyq. Jasampazdyq» atty saılaýaldy baǵdarlamasynda Qazaqstandaǵy kásipkerlikke jasalatyn jaǵdaıdy álemniń jetekshi elderindegi deńgeıge deıin jetkizýdi ózine mindet etip alǵan. Sondyqtan da kedendik basqarýdy jáne ruqsat júıesin jaqsartýǵa, sýbsıdııalaý úderisi men nesıe kepildigin avtomattandyrýǵa jiti kóńil bólinip keledi. Al partııa jetekshileriniń 2021 jylǵa qaraı Qazaqstandy «Doing Business» reıtıngi boıynsha 25 ozyq memlekettiń qataryna qosý mindetin qoıyp otyrǵandyǵyn eskersek, el ekonomıkasynyń negizgi tiregi sanalatyn orta jáne shaǵyn kásipkerlikti damytý qajettiligi týyndaıtyny sózsiz. Endeshe, osy turǵyda Ulttyq kásipkerler palatasy men «Nur Otan» partııasynyń búgingideı mámilege kelýi óte oryndy bolmaq. «Nur Otannyń» biz arqyly shaǵyn jáne orta kásip salasyna bet burýy zor jaýapkershilik ári úlken jetistik. Sebebi, partııa búgingi qoǵamdaǵy óte aýqymdy saıa­sı kúsh bolsa, Ulttyq palata alyp ekonomıkamyzdyń boıyna qan júgirtetin kásipkerlikti retteıtin negizgi kilt. Sońǵy kezderi Ulttyq palata shalǵaı eldi mekender men alys aýdandardaǵy halyqty shaǵyn jáne orta kásipke baýlyp, úıretýde arnaıy ortalyqtar men keńseler ashyp, belsendi áreket etýde. Endi osyndaı ıgi istiń basyna «Nur Otan» partııasynyń kelip, qyzmet aıasyn keńeıtýin óz basym jaqsylyqqa balaımyn. Partııa janyndaǵy qoǵamdyq keńes pen palatanyń óńirlik keńes músheleri arqyly kásipkerliktiń damýyna tyń serpin beriledi dep sanaımyn», – dedi «Atameken» UKP Basqarma tóraǵasy Abylaı Myrzahmetov. Onlaın rejimde ótken alqaly jıynda partııanyń oblys ortalyqtaryndaǵy fılıaldary tikeleı baılanysqa shyǵyp, aımaqtardaǵy kásipkerlik qyzmettiń jaı-kúıin baıandady. Atap aıtqanda, Ońtústik Qazaqstan oblystyq partııa fılıaly tóraǵasynyń birinshi orynbasary Bolatbek Qystaýov, «Atameken» UKP Atyraý oblystyq óńirlik keńesiniń tóraǵasy Asylbek Jakıev, Almaty oblysynan jekemenshik «Dana» bilim berý kásipornynyń dırektory Kúlánda Batyrbekova sóz sóılep, óz kásipteriniń jetistikteri men kezdesken qıyndyqtardy sheshýdegi tájirıbelerimen bólisti. Olar kásipkerlik qyzmettiń ósip-órkendeýine partııanyń tize qosa eńbek etip, úılesimdi jumysqa úndeýin qoldaıtyndyqtaryn bildirdi. Osydan keıin sóz alǵan «Nur bereke 555» JShS bas dırektory Táýken Keńesbekuly eldiń jetekshi partııasy men ulttyq palatanyń osyndaı memorandým bekitýi otandyq taýar óndirýshilerdi qoldaýǵa zor múmkindik beretindigin alǵa tartty. «Biz bir ǵana Astana qalasynyń ózinde otandyq taýar óndirýshilerdiń basyn qosýǵa umtylyp otyrmyz. Kúni keshe ǵana «Samǵaý» atty saýda úıin ashyp, zamanaýı úlgige saı 5 myń sharshy metrdi quraıtyn saýda alańyn iske qostyq. Ol jerde 100-den asa astanalyq kásipker ónimderin saýdalaýda. Aldaǵy ýaqytta 300 óndirýshi óz ónimderin qoıýǵa nıet tanytýda. Keleshekte bul baǵyttaǵy kórsetkishimizdi 15 000 sharshy metrge jetkizýdi kózdeımiz. Osylaısha, qazir shashyrańqy baǵytpen damyp jatqan otandyq taýar óndirýshilerimizdi bir jerge toptastyrý arqyly olardyń naryqqa enýi men tanymaldyǵyn arttyrǵymyz keledi. Al endi osy jumysymyzǵa nurotandyqtar qosylsa, kásipkerlik qyzmettiń damýy arqyly qoǵamnyń áleýmettik jaǵdaıy jaqsara túsedi degen senimdemin», – dedi T.Keńesbekuly. Nurlybek DOSYBAI, «Egemen Qazaqstan»