Hat qorjyn

...qoldaý kórsetedi Rýhanı azyqqa qamqorlyq Búgingi tańda turmysy tómen otbasylarǵa, múmkindigi shekteýli jandarǵa elimizde san túrli shara júzege asyrylyp jatqany belgili. Osyndaı jarqyn ister Aqjaıyq aýdany­nyń Alǵabas aýylynda da az emes. Qoldan kelgen kómekke aıanbaýdan, saýaby mol iske atsalysýdan mysal jetkilikti. – Aýdandyq máslıhat depýtaty, «Qadesh» sharýa qoja­lyǵynyń múshesi Daryn Boran­baev tabysy az aǵaıynǵa rýhanı azyqpen qamqorlyq jasaý­dy uıǵardy, –deıdi Alǵa­bas aýyldyq okrýgi ákimi appa­ratynyń jetekshi mamany Ulbolsyn Muqanalıeva. – Iаǵnı, 7 otbasyny memleket­tik saıasatty nasıhattaıtyn basty basylym – «Egemen Qazaqstanǵa» jazylymdy hattaýǵa 25 myń teńge aqsha­syn shyǵardy. Aýyl­das­taryn gazet-jýrnalǵa jazdyrtý jó­ninde janashyrlyq barlyq jerdegideı Alǵabasta da az emes. Bolat QOSJANULY  Batys Qazaqstan oblysy, Aqjaıyq aýdany  ...senim artady Jol jóndelse deımiz 1991 jyly Semeı polıgony jabylǵan soń, Abyraly aýdany qaıta quryldy. Al 1992 jyly Elba­sy bekitken «Semeı ıadro­lyq synaq polıgonyndaǵy ıadrolyq synaqtar saldarynan zardap shekken azamattardy áleýmettik qorǵaý týraly» zań qabyldandy. Búgingi tańda Abyraly jur­ty Úki­mettiń túrli baǵ­dar­lama­lary­­na baılanysty qabyldaǵan joba­lardyń kómegin kórip otyr. Desek te qazirgi tańdaǵy eń bas­ty da ózekti másele jol der edik. Qaı­nar – Semeı tasjoly 280 sha­­qy­rymdy quraıdy. Ol respýb­lıkalyq deńgeıdegi eń mańyzdy kúre joldardyń biri. Semeı – Qaınar tasjoly arqyly 3 ob­lystyń – Shyǵys Qazaqstan, Qa­ra­ǵandy, Pavlodar halqy qa­rym-qatynas jasaıdy. Astana men Semeıge osy jermen júrý kezinde tıimdi bolǵan. Onyń boıynda Abaı aýdanyna qarasty Sarjal, Qyzyltý aýyldary, burynǵy Shubartaý aýdanynyń aýyldary men Abyraly aýdanyna qarasty alty aýyl ornalasyp, bir-birimen osy jol arqyly qatynas jasaıdy. О́ńirde temirjol, áýe qatynasy men sý qatynasy áýelden bolǵan emes. Barlyq tirshilik, qarym-qa­ty­­­nas tikeleı osy tasjol ar­qy­ly ja­salady. Búginde Semeı-Qaı­nar tasjoly múldem júrýge jaram­syz, syn kótermeıdi. Osy atal­ǵan is-shara qolǵa alynsa, aýyl turǵyndary atynan aldyn-ala rı­za­shylyǵymyzdy bildirer edik. Nurqasym ÁJITAEV Shyǵys Qazaqstan oblysy, Qaınar aýyly  ...úlgi tutady Istiń tetigi endi tabyldy Qarasý aýdanynyń jeke kásip­keri atanyp úlgergen Jol­dy­baı Osýpov 15 jyldyq eńbek ótili bar aıaq kıim tigý sheberi. Ol bıznesmen degen márte­bege endi ǵana boı úıretýde. О́ıtkeni, aıaq kıim jóndeýge arnal­ǵan jeke sheber­hana­­syn jaqynda ǵana ashqan. Buǵan deıin Joldybaıǵa aýyldastary telefon shalý ar­qy­ly tapsyrys beretin, sodan keıin ol qońyraý kelip túsken úılerdi aralaı júrip, búlingen aıaq kıimderdi úıine jınap alyp keledi. Onyń bul talanty aýdandyq ákimdikke de, kásipkerler palatasyna da jetti. Sóıtip, Qarasýda aıaq kıim jóndeıtin bir de bir sheber­hana bolmaǵandyqtan, Joldy­baıǵa osy olqylyqtyń ornyn toltyrýǵa usynys jasaldy. Ol «Bıznestiń jol kartasy-2020» baǵdarlamasy boıynsha grantqa ótinish bildirip, 660 myń teńge qarajatqa ıe boldy. Ony ol tigin mashınasy jáne basqa da qajetti qu­ral-jab­dyqtar satyp alýǵa jumsady. «Qazir dúken ǵımaratynan bir ból­meni jalǵa alyp otyrmyn. Endi klıentterge ózim bar­maı­myn, olar maǵan keledi. Bu­dan el aıaǵy azaı­ǵan joq, jurt jańa sheberhana ba­ryn bilip al­ǵan, kúnine 5-6 adamnan keledi. Bul ta­bysy jyl on eki aı boıy tú­sip turatyn mamandyq», – deı­di Joldybaı Osýpov. Abaı BOLSYNOV Qostanaı oblysy  ...rızashylyǵyn jetkizedi Shıpager shapaǵaty Jaqynda Ońtústik Qazaqstan oblysy, Saryaǵash aýdany, Derbisek aýylyndaǵy bir emshi týraly estip, baryp qaıttym. Al­ǵash­qy kúnderi emshi Nurdáýlet Juma­dildaevqa kúmánmen qarap, «Men sizdiń qolyńyzdyń bıotogy bar ekenine senbeımin», dep ashyq aıttym. Emshiniń bul jóninde arnaıy dıplomy bar eken. Áıtse de meniń kózimdi jetkizbek bolyp ol ústel ústindegi gradýsnıkti qolyna alyp edi, bes mınótten keıin álgi gradýsnıktiń jylýy 39-ǵa jetti. Sosyn qolyn baýy­rym­nyń tusyna qoıdy. Qoly tı­gen jeri kádimgideı ysyp, qyza jóneldi. О́mir boıy partııa qy­zmetinde bolyp, ateıstik tár­bıe alǵandyqtan mundaı quby­lysqa esh senbeıtinmin. Emshi Nurdáýlettiń bul qasıeti kúmánim­niń bárin joq qyldy. Nurdáýlettiń taǵy bir qasıeti óte sabyrly, asyqpaıdy. Ol bir rýh­tyń jelep-jebep, tylsym kúsh­ke ıe bolatynyn, erki­nen tys áre­ketke barmaıtynyn, bá­rin tek aıan bildirý arqyly oryn­daıtynyn aıtady. Qazir sonaý Qostanaı, Aqmola, Almaty, Jam­byl oblystarynan kórshi О́zbek­stan, Qaraqalpaqstan el­deri­nen kelip emdelýshiler bar. О́zim emdelgen bir aıdyń ishinde 17 kisi­niń ár­túrli keselinen jazylyp, úılerine kúlip-oınap qaı­typ bara jatqanyn kórip, Nur­dáýlet emshige degen senimim bekı tústi. Saryaǵash aýdany, Qara­bulaq aýylynyń turǵyny Salavar Ábdihalyqqyzynyń sal bop qalǵanyna biraz jyldyń júzi bolǵan eken, 20 kún em alǵan ol úıine bir taıaqqa súıenip, óz aıaǵymen qaıtty. Osy hatty Nur­dáýlet emshiniń shapaǵatyn kór­gen jan retinde basqalarǵa da shı­pasy tıe bersin degen nıetpen jazyp otyrmyn. «Aýrýdy bergen Alla emin de beredi», degen. Laıym osy sóz ómirden óz kórinisin tapsyn. Qambarbek IŃKÁRBEKULY, soǵys jáne eńbek ardageri Jambyl oblysy  ...súısinis bildiredi Balalar «Aqbóbekte» qaýyshty Qarǵaly ózenin Aqtóbe qala­sy­nyń turǵyndary maqtanysh tuta­dy. Qalamen irgeles aǵyp jat­q­an ózen mańy janǵa jaıly, tabı­ǵaty kórkem erekshe jer. Osy bir tumsa tabıǵat aıasynda «Aqbóbek» balalar demalys lageri ornalasqan. Jazdyń bastalýyn kútken  balalar sonda barýǵa asyǵady. Olar úshin eń qyzyqty da dýmandy shaq endi bastalǵandaı. Bir-birimen jaqyn tanysyp, dos­tasyp ta úlgergen. Lager aýlasy muntazdaı tap-taza, jasyl jelek jaıqalyp tur. Bul jerde qa­la­nyń adamdy mezi eter ý-shýy­nan alystap, jutqan bir jutym aýanyń da baldaı tátti dámin sezingendeı bolasyń. Lagerdiń ashylý saltanatyna balalardyń ata-analary da kóp jınaldy. Jınalǵandar aldynda balalar men olardyń tálimgerleri óz óner­lerin kórsetip, túrli oıyndar ótkizdi. Ádemi áýen yrǵa­ǵyn­da tálimgerler de bı bılep berdi. Kishkentaı balýandar óz óner­lerin kórsetse,  parktiń nus­qaý­­shylary sheberlik synybyn ót­kizip kópshilikti tánti etti. Án men jyrǵa, bıge toly ótken lager­diń alǵashqy maýsymynyń ashylý saltanaty demalýǵa kelgen bala­lar­dyń esinde uzaq ýaqyt boıy saqtalyp qalatyndaı áserli ótti. Irına QOSPAǴANBETOVA Aqtóbe oblysy