Kóneden syr shertken

Qazaqstan Respýblıkasy Qarýly Kúshteri Ulttyq áskerı-patrıottyq ortalyǵynyń Ás­kerı-tarıhı mýzeıinde vengrııalyq fotosýretshi Bela Bernolaktyń «Býdapeshttiń 1945 jyldan búgingi kúnge deıingi damýy» atty fotokórmesiniń ashylý rásimi ótti. Fotosýretshi Bela Bernolak 1967 jyly Býdapesht qalasynda týǵan. Ákesinen mura etken fo­toónerge degen mahabbaty men sýretke túsirý óneriniń daǵ­dy­lary ony búgingi bıikke jetelegen. Bela Bernolaktyń eńbekteri Býdapesht qalasynyń polısııa basqarmasynyń rezıdensııasynda, memlekettik mekemeler men Býdapeshttegi balalar temir-joly stansasy qabyrǵalarynyń sánin kirgizip tur. «Býdapeshttiń 1945 jyldan búgingi kúnge deıingi damýy» atty fotokórme Býda­pesht polısııasynyń, jedel járdem qyzmetkerleriniń, órt sóndirýshilerdiń jáne tó­tenshe jaǵdaı qyzmeti ju­mys­shylarynyń kúndelikti eńbekterin beıneleıdi. Avtordyń týyndylary Býdapesht qalasynyń ásemdigi men damýyn ǵana emes, sonymen birge, soǵystan keıingi jyl­dar­daǵy Vengrııadaǵy birlesý, bostandyq alý kúresin, qaıta jańǵyrtýlardyń qıyn joldaryn kórsetedi. Fotosýretshiniń keıbir jumystary Parlament ǵımaratynyń tóbesinen, Ko­roldik saraıdaǵy Ulttyq Ga­le­reıanyń tóbesinen jáne ótýge tyıym salynǵan jerlerden túsirilgen. Aıtýly sharaǵa elimizdiń qoǵam, ǵylym men mádenıet qaıratkerleri, Qorǵanys mı­nıstrliginiń basshylary, Qa­zaqstan Respýblıkasyndaǵy Ven­grııa elshiligi isterindegi Ýaqytsha senimdi ókili Shandor Dorogı myrza jáne avtordyń ózi qatysyp, kóneden syr sherter kórmeniń máni men mańyzyna toqtalyp ótti. Raýan QAIDAR, «Egemen Qazaqstan» Sýretti túsirgen Orynbaı BALMURAT