• 12 Shilde, 2016

Aqparattar aǵyny

301 ret

kórsetildi

2 mın

oqý úshin

Egemen Qazaqstan

Úkimet 3200 jumyskerdiń jalaqysyn sýbsıdııalaýdy bastaıdy. Ony Densaýlyq saqtaý jáne áleýmettik damý mınıstrligi qanat qaqty rejimde júrgizedi. Shara qarjy jaǵdaıy kúrdeli kásiporyndardyń jumyskerlerine qatysty jasalady. Bul týraly vıse-mınıstr Birjan Nurymbetov málimdedi.
Turǵyn úı máselesin túbegeıli sheshý úshin 15 jyl ishinde 1,5 mln. páter salynady. Ulttyq ekonomıka mınıstri Qýandyq Bıshimbaevtyń aıtýynsha, bul mindetterge qol jetkizý maqsatynda Elbasy nesıege beriletin turǵyn úıdi satyp alý úshin «Báıterek» UBH» aksıonerlik qoǵamyn biryńǵaı operator etip belgilegen.
Astanada jeńil relsti kólik jolynyń qurylysy bastalady. Kelesi aıda qurylysy qolǵa alynatyn bul jumys elordanyń mega jobasy bolyp tabylady. Al shoıyn joldyń qurylysy 2018 jyldyń kúzinde aıaqtalady. Ol zamanaýı jolaýshylardy tasymaldaý júıesi Astana halyqaralyq áýejaıy men jańa temirjol vokzalyn baılanystyratyn bolady.
Tarazdyń halyqaralyq áýejaıynda Reseı men Tájikstanǵa shyǵatyn turaqty reıs ashyldy. Jambyl oblysynyń ákimdiginen habarlaǵandaı, «Hodjand-Taraz-Hodjand», «Sýrgýt-Taraz-Sýrgýt» atty alǵashqy jolaýshylar reısi boldy. «Sonymen birge, bıylǵy jyldyń 10 shildesinen bastap «Nıjnevartovsk-Taraz-Nıjnevartovsk» jáne «Túmen-Taraz-Túmen» baǵyttary boıynsha turaqty reıs ashyldy», – delingen habarlamada.
Atyraýda bekire tektes balyqtyń tuqymdyq qory jasaqtalýda. Bul balyq ósirý zaýyttarynyń irkilissiz jumys isteýi úshin kerek. Munda bekire, qortpa, shoqyr men súırik balyqtarynan qajetinshe tuqym alýǵa bolady.
Jetim balalardyń ortaq bazasy quryldy. Elimizdiń Bilim jáne ǵylym mınıstrligi jetim balalar men ata-ana qamqorlyǵynsyz qalǵandarǵa otbasy jylýyn syılamaq. Derekter bazasynda balanyń jynysynan bastap, densaýlyq jaǵdaıy, minezi, týystarynyń bar-joqtyǵy túgel kórsetiledi. Aqparatta bala saýalnamasynyń nómiri de kórsetiledi. Derekter banki keler jyldyń 1 qańtarynan bastap jumys jasaıdy.
Zańsyz balyq aýlaǵandardan memleket paıdasyna 60 mln. teńge óndirildi. Tabıǵat qorǵaýshylar Ile ózenin áýeden, sýdan jáne qurlyqtan baqylaýdy qolǵa aldy. Birlesken sharanyń nátıjesinde jyl basynan beri 2 tonnadan astam balyq, 20 shaqyrym Qytaı aýlary jáne ondaǵan motorly qaıyq tárkilengen. Buǵan qosa, balyq aýlaýdyń eń soraqy ádisterin qoldanǵan 6 zań buzýshy ustaldy.