Baıan-О́lgııdegi sý tasqyny

qandastarymyzǵa qıyn tıip jatyr 10 shilde kúni Mońǵolııadaǵy qazaqtardyń erteden bergi qutty qonysy bolǵan Baıan-О́lgıı aımaǵynyń ortalyǵy – О́lgıı qalasynda tótenshe jaǵdaı oryn aldy. Birneshe kún boıy tolassyz jaýǵan jańbyrdyń saldarynan asaý aǵyndy Qobda ózeniniń jaǵasynda, ıen taýdyń bókterinde ornalasqan eldi mekenge qarǵyn qulap, osynda turyp jatqan jurtty biraz ábigerge ushyratty. Ázirge bul jaqtan resmı kelip jatqan maǵlumattar joq. Degenmen, keıbir derek kóz­derinen jetken aqparlarǵa qaraǵanda, osy seldiń saldarynan qonysta 2 úlken kisi, 4 bala qaza tapqanǵa uqsaıdy. Al taǵy bir aqparat qaınarlarynan taraǵan málimetter boıynsha, kelesi kúni qalaǵa taǵy da sý tasqyny lap qoıǵan. Bir qýanyshtysy, der kezinde kelip jetken qut­qarýshylar kómegimen sýdy basqa arnaǵa buryp jiberýdiń oraıy kelipti. Qala ákimshiligindegi bar­lyq satyly qyzmetkerler tur­ǵyndardy selden qutqarý jumysyna tartylypty. Aımaq ortalyǵynda ornalasqan 6 jáne 9-baqtar aýmaǵynda júrgen seldiń zardaptaryn joıý jumystary jalǵasýda. Sol aýdandarda sý basý qaýpi bar úıler turǵyndaryn basqa qaýipsiz telimderge kóshirý jumystary qatar júrýde. Olarǵa jańadan jer bólinip berilýde. О́lgıı qalalyq ákimshiligi ázirge úıleri selge ketken kisilerge arnaıy oryndardan jer telimderin berip, sol jerlerge kıiz úımen ornyqtyryp jatyr. Úı-múlki selge ketkenderge ázirge eshkim materıaldyq kómek qolyn soza qoımaǵan. Keshegi aqparattarǵa qaraǵanda, 6-baqtan 7 úı, 9-baqtan 120-daı úı jaramsyz halge jetken. «Bir ǵana 6-baq aýmaǵyndaǵy sý alǵan úılerdiń aýlalaryn 10 tonnalyq sısternalar arqyly sorǵyzyp azaıtyp jatyr. Bir aýlanyń ózinen ortasha 200-400 tonna sý shyǵýda!» – dep jazady áleýmettik jeli qoldanýshylar. «Egemen-aqparat»