Birikken ushaq pen poıyz

Shveısarııanyń Lozanna qala­syndaǵy federaldy polıteh­nıkalyq mekteptiń bir top zert­teýshileri temirjol vagony men ushaqty biriktirý týraly jańa jobany usyndy. Olar bul jobany Clip-Air dep atap otyr. Mamandar bul is júzege asqan jaǵdaıda kóp­tegen nárseni tıimdi ári jyldam oryndaýǵa bolatynyn aıtady. Eger qajetti qarajat bólinse, joba shamamen 50 jyldyń kóle­minde iske asýy múmkin. Bú­ginde je­rgilikti mamandar Clip-Air bir­lestigin daıyndap qoıdy. Osy arqyly aldaǵy 5-10 jylda bıznes-djetke saı kólemde vagon men tasymaldaýshy ushaqtyń prototıpin jasap shyǵarady. Vagon prototıpi 150 jolaýshyǵa deıin tasymaldaı alady. Boljam boıynsha, aldaǵy ýa­qytta vagondar men avtobýstar ushaq korpýsy túrinde jasalýy múmkin. Árqaısysy 450 jolaýshy nemese 30 tonnaǵa deıin júk tasymaldaı alady. Mundaı kólik túrlerine arnaıy bekitý júıesi ornatylady. Osy arqyly aeroportqa kelgennen keıin tasymaldaýshy ushaqqa tirkeledi. О́tken jyldyń qarasha aıynda AQSh-tyń patent bıýrosy Airbus avıaqurylys kompanııasyna ajyramaly ushaqqa patent bergen. Buryn-sońdy bolmaǵan jańa apparatta almaly-salmaly kapsýla, ıaǵnı jolaýshylar salony men júk tıeıtin oryn qarastyrylǵan. Málimetterge sáıkes, kapsýlalar aeroport termınalynyń bir bóligi bolýy ábden múmkin. Ushaq kelmeı turyp, oǵan júkterdi tıeıdi, al jolaýshylar osy ýaqyt aralyǵynda óz oryndaryna otyrady. Ushaq áýejaıǵa kelgen bette arnaıy kran jolaýshy toly kapsýlany ushaqtan alyp, ornyna jańa kapsýlany qoıady. Osydan keıin ushaq jerge qonbastan, qaıta ushyp kete alady. Osy arqyly bárin jyldam júzege asyryp, ushaqtyń jerdegi ýaqytyn aıtarlyqtaı qysqartýǵa bolady. Shveısarııa ǵalymdary alǵash ret bul jobany 2011 jyly usynǵan eken. Aıan ÁBDÝÁLI, «Egemen Qazaqstan»