Zardap shekkender arasynda qazaqstandyqtar joq

Keshe Syrtqy ister mınıstrliginiń baspasóz hatshysy Ánýar Jaınaqov jýrnalısterge Fransııanyń Nıssa qala­syndaǵy terrorlyq aktige baılanysty habarlama jasady. Onyń atap ótýinshe, teraktiden keıin Qazaqstannyń Fransııadaǵy elshiligine bes qazaqstandyq habar­lasqan. Olardyń tórteýi oqıǵa ornynda bolǵanyn jáne qandy oqıǵany kózderimen kórgenderin aıtqan. Taǵy bir qazaqstandyq elshilikke tańerteń habarlasqan. Terrorlyq shabýyl kezinde ol Nıssa jaǵalaýynda bolmaǵan, Nıssaǵa beısenbi kúni keshke barǵan eken. Syrtqy ister mınıstrliginiń aqparaty boıynsha, teraktiden keıin dıplomatııalyq mıssııaǵa Qazaqstannyń bir azamaty habar­lasyp, óziniń Aǵylshyn jaǵalaýy mańyn­daǵy qonaq úıde ekenin, onymen birge taǵy úsh adam bar ekenin jetkizipti. «Olar óz ómirleri úshin alańdaǵan. Qaza tap­qan­dardyń máıitteri men jaralanǵandardy terezeden kórgenin aıtyp, kómek suraǵan. Bizdiń dıplomattar olarǵa ýaqytynda qaýipsizdik sharalaryn túsindirip, qaýip­ten saqtaný jóninde keńester berdi. Qazir olar qaýipsiz jerde, eshqaısysy japa shek­ken joq, – dedi Syrtqy ister mınıstrligi baspasóz qyz­metiniń basshysy Ánýar Jaınaqov. Á.Jaınaqov olardyń Nıssaǵa demalýǵa barǵan otbasy ekenin atap ótti. Onyń habardar etýin­she, olardy elge jetkizý boıyn­sha kómek qa­jet emes. Alaı­da, qazaqstandyq konsýldar olar­men baı­lanys us­tap otyr, qosymsha kómek qa­­jet bol­ǵan jaǵdaıda jár­­demdesýge daıyn. «Nıs­s­a­da bolǵan teraktige baı­la­nysty Fransııa hal­­qyna kóńil aıtamyz, – de­di ol ári qaraı. Aldyn ala má­li­­met boıynsha, qaza tap­qa­ndar men zardap shek­kender ara­syn­da qazaq­standyqtar joq». Shildeniń 14-i kúni Nıssa jaǵalaýynda Bastı­lııa qamalyn alý kúnin mere­keleý kezinde júk kóligi ot­sha­shýdy tamashalaýǵa jı­nal­ǵan adamdardy basyp-jan­shyp, eki shaqyrymdaı júrgen. Shabýyl saldarynan 84 adam qaza tapty, onyń ishin­de balalar da bar. Taǵy 18-i aýyr jaraqatpen aýrý­ha­na­ǵa jetkizildi, jal­py 100-den astam adam jara­qattanǵan. Fransýzdyq BAQ júk kóliginen 31 jastaǵy Nıssa turǵynynyń jeke kýáligin tapqanyn, onyń Fransııamen qatar, Týnıs azamaty bolǵanyn habar­lady. Polısııa júk kóliginiń júrgizýshisin atyp tastady. Kúsh qurylymdary onyń sybaılastarynyń bolǵanyn, ne bolmaǵanyn anyqtap jatyr. Álısultan QULANBAI, «Egemen Qazaqstan»