Tarazdan kelgen turǵyndar nege Aqtóbeniń bıýdjetinen mıllıondaǵan teńge alyp, osynda gúl alańdaryn jasap júr? Aqtóbedegi
«Dıapazon» gazetiniń tilshisi oblys ákimi Berdibek Saparbaevtan osynyń jaıyn bilgisi kelip, týrasynan suraq qoıǵan. Atap aıtqanda, jýrnalıst Aqtóbede áldeqandaı jumystardy júrgizýdegi memlekettik tapsyrystardyń tenderlerin basqa jaqtan kásiporyndar utyp alyp jatatynyna aımaq basshysynyń qalaı qaraıtynyn bilgisi kelgen. Máselen, qalada gúl alańdary men gazondar jasaý úshin jergilikti bıýdjetten bólingen 400 mln. teńgeniń 200 mıllıonyn Taraz kompanııasynyń jeńip alǵanyn qalaı túsindirýge bolady? Jergilikti kásipkerlerge qoldaý kórsetý qaıda qalǵan sonda?
Oblys ákimi de jaýaptan jaltarmaı, buǵan óziniń kózqarasyn ashyq bildirgen. Onyń aıtýynsha, jergilikti kásipkerlerge qoldaý kórsetý jaıy kún tártibinen túspegen.
«Jergilikti taýar óndirýshilerge qoldaý kórsetilýi kerek, - dedi B. Saparbaev. – Bul úshin biz ózimizde neniń bar, neniń joq ekenin anyqtap alatyn tutynym balansyn jasap kórdik. Eger shynymen ózimizde joq nárse bolsa, syrttan ákelýimiz kerek. Sondyqtan biz osynyń bárin qadaǵalap otyramyz. Zańǵa sáıkes, kez kelgen azamattyń, Qazaqstannyń zańdy tulǵasynyń, qaıda turatynyna qaramastan, tenderlerge qatysýǵa quqy bar. Biraq bizde syrttan kelgen kompanııalardyń tenderlerdi utyp alǵan mundaı faktileri kóp emes. Endi gúl ósirý jaıyna kelsek. Men qala kóshelerin aralap, munda bizderdiki men tarazdyqtardyń qandaı gúlder ekkkenderin kórip shyqtym. Solardaǵy tarazdyqtar men bizdiń kásipkerler ekken gúlderdiń ár sharshy metri qanshaǵa túskenin eseptep kórdik. Sonda Taraz kásiporny jumysshylarynyń óte jaqsy jumys jasaıtyndary baıqalyp qaldy. Olardyń ósirgen gúlderine ózderińiz de qarańyzdar. Men jáne olarǵa gúlderi solyp qalatyn bolsa, onyń ornyna óz esepterinen jańasyn qaıta otyrǵyzatyndaryn aıttym. Tarazdyqtar jumysqa da jergilikti kadrlardy alyp, olarǵa gúl egýdi úıretip jatyr. Keleshekte osylar gúl ósirýdiń mamandary bolyp shyǵa keledi. Men ózimizdiń kompanııa adamdarynyń birinen gúl alańynyń qansha sharshy metr ekenin suradym. Ol 50 sharshy metr dep jaýap berdi. Al qarap tursam, aıtyp turǵan aýmaǵy 20 sharshy metr de bolmaıdy».
Aımaq basshysy osyndaı kemshilikteri bolǵandaryna qaramastan, jergilikti kompanııalardy iske kóbirek tartýdyń kerek ekenin ashyp aıtty.
«Degenmen, bizdiń basty pozısııamyz – jergilikti taýar óndirýshilerge qoldaý kórsetý. Biraq olar osyǵan laıyqty sapaly jumys jasaýlary kerek. Asfaltty alaıyq. Ony ótken jyly bizdiń kompanııalar jasady. Bıyl sony qaıta jasap jatyr. Men sosyn endi taǵy osyndaı olqylyqtar jiberetin bolsa, jumysqa jibermeıtinimizdi aıttym. Bıylǵy jyly biz 40 shaqyrymǵa jýyq aýmaqty, 30-ǵa tarta kósheni jóndeýden ótkizýimiz kerek. Alaıda, bizdiń kompanııalarymyz bulardy jasap úlgere alatyn emes. Sondyqtan qazir Astanadan adamdar shaqyrdyq, olar iske kirisip ketti. Bizge munyń bárin qysqa deıin aıaqtap shyǵý kerek», - dedi B. Saparbaev sóziniń túıininde.
Murat AITQOJA
