Amanbaıdyń úıi aman qaldy

    Qostanaı-Qarabutaq tas joly óńirdegi eń uzyn ári qozǵalysy kóp jol. Sondyqtan munda kún demeı, tún demeı jol-patrýldik polısııa qyzmetkerleri kezekshilik atqarady. Qys aılarynda osy joldyń boıynda dońǵalaǵy jarylyp nemese qarǵa keptelip qalǵan kólikterdiń jolaýshylaryn polıseıler talaı ret aman alyp qalyp júr. Oblystaǵy jol-patrýl polıseıleri Iýrıı Jaqypov pen Ermek Jýanyshbaev qazan aıynyń bas kezinde tańǵy saǵat 04.00-de Qostanaı – Qara­butaq tas jolynyń Taran aýdany aımaǵyna ótip bara jatqan. Kenet osy joldyń boıynan 3 shaqyrymdaı jerde jatqan Naberejnoe selosynan shyqqan jalyndy baıqap qalady. Tań qarańǵysynda ottyń jalyny jalańdap jatyr. Eki polıseı dereý ot shyǵyp jatqan úıge jetip keldi. Mal qoranyń artyna jıǵan shóp órtenip jatyr eken. Ermek mal qoranyń esigin buza bastady, al Iýrıı úıdiń esigin qaǵyp, adamdardy oıatýǵa kiristi. Qorada 7-8 sıyr, onshaqty qoı, biraz taýyq bar eken. Jalyn saraıǵa ıek arta bastaǵan. Ermek baılanǵan sıyrlardyń bas jibin tezdetip sheship, barlyǵyn dalaǵa aıdap shyqty. Al Iýrıı esikti qatty-qatty uryp, odan úı­di aınalyp júgirip, terezeni de qaq­ty. Tańǵy tátti uıqy ǵoı, úıdegi adamdardyń oıanatyn túri joq. Eki polıseı de aıqaıdy saldy, olardyń daýsynan kórshilerdiń arasyndaǵy qus uıqyly jandar oıanyp ketipti. Osy kezde úı ıesi Amanbaı da dalaǵa atyp shyqty. Uıqysyrap qalǵandaı ma, ne bolǵanyn túsinbeı ań-tań bolyp tur. Odan áıeli, balalary shyqty, órt bolyp jatqanyn estisimen azan-qazan bolyp bala-shaǵasy shýlap jylap qoıa berdi. Bala-shaǵasynyń nápaqasyn óziniń qorasyndaǵy malymen taýyp otyrǵan eńbekqor, О́zbekstannan kelgen oralman aǵaıyn eken. Tirnektep jıǵan maldyń, ózderiniń aman qalǵanyn oılaǵanda úı ıeleriniń de kózine jas keldi. Tańǵy tynyshtyq bol­ǵanymen, kúzdiń eptep yzǵy­ryq jeli esedi. Jel bolsa tilsiz jaýdyń da jyny qoza túsetin ádeti. Keptirilip jınalǵan shóp laýlaǵanda jalyny aspanmen talasqandaı boldy. Iýrıı bul kezde Taran aýdanyndaǵy órt sóndirýshilerge habarlasyp, shaqyryp qoıdy. Biraq olar kelgenshe kórshiler shelekpen sý tasyp, topyraq shashyp, áıteýir áýpirimmen otty aýyzdyqtap alǵan edi. Amanbaıdyń mal qorasy, oǵan irgeles úıi men garajy, mashınasy – bári ottan aman qaldy. Jarty saǵat bolmaı jetip kelgen órt sóndirýshiler otty sońyna deıin zalalsyzdandyrdy. Osy órt oqıǵasynan bir-eki kúnnen keıin polısııa starshınasy Iýrıı Jaqypov pen serjant Ermek Jýanyshbaev kezekshiliginde Naberejnoe selosyndaǵy Aman­baı Serikbaevtyń otbasyna arnaıy soǵyp, hal-jaǵdaılaryn bile ketti. Amanbaı men áıeli Tóre­kúl jigitterge alǵysyn jaý­dy­ryp, taǵy da kózin bir shylap aldy. «Sender sol túni bizdiń úıge kelgen Qydyr shyǵarsyńdar. Áıtpese, qyzyl ot tańǵy uıqyda jatqan bala-shaǵamyz ben bizdi de jalmaıtyn edi. «Mal – jannyń sadaqasy» desek te, balalardy asyrap otyrǵan kúnkórisimiz ǵoı, onyń amandyǵyna da qýandyq. О́rkenderiń óssin!» dedi Amanbaı. О́rt bolǵan túni Serikbaevtardyń úıinde ózderiniń tórt balasyn jáne týystaryn qosqanda bar­ly­ǵy 12 adam bolǵan kórinedi. Názıra JÁRIMBETOVA, «Egemen Qazaqstan»  QOSTANAI Sýrette: Polıseıler ózderi órtten qutqarǵan Serikbaevtar otbasymen birge