Zaman talabyna saı jas býyn ókilderiniń shet elderge baryp bilim alyp, elge oralysymen, otandyq ónim óndirýdi jedel júzege asyra bastaǵany qýantady. Bul úrdis Jetisý jerinde de jyldam júzege asyrylyp jatyr. Eń bastysy, sapaǵa basa nazar aýdarylady.
«Osy seriktestiktiń bıznes-jobasyn 2013 jyly ózim jasap, araǵa eki jyl ýaqyt salyp, zaýytty iske qosý múmkindigine ıe boldyq. Sol ýaqyttan beri óndiris orny toqtaýsyz jumys istep keledi. Búgingi tańda 120 adam eńbek etedi. Qajetti shıkizatty Pavlodardaǵy Qazaqstan elektrolız zaýytynan alamyz. Kádimgi kirpish ispetti árqaısysy 20-50 kılolyq qurǵaq «shýshka» dep atalatyn shıkizatty alyp, balqytyp, bılet degen qosyndyny qosamyz. Dıametri - 203 mm. jáne 152 mm., uzyndyǵy – 6 metr. Pavlodardan kelgen shıkizattyń ishindegi magnıı men marganesti eritý arqyly bólemiz. Hımııalyq quramy eýropalyq standart boıynsha 6063,6463,6060 bolady. Jalpy, bizdiń sala óndirisinde alıýmınıı profılın óndirý arqyly anodty oksıd degen jańa tehnologııamen túsin ózgertemiz. Sonda bizdiń ónim barlyq talap boıynsha eýropalyq standartqa sáıkes kelip otyr. Ekologııalyq turǵydan teksergende, plastıkte zııan bar ekendigi, al alıýmınııde joqtyǵy anyqtalǵan. Búginde Eýropa memleketterinde alıýmınııdi qaıta óńdeý tásili bar. Mysaly, óndiris oryndarynda jasalynǵan alıýmınıı ónimderi talapqa sáıkes kelmeı jatsa, sol ónimdi qaıta óńdep balqytýǵa bolady» dedi Aluminium of Kazakhstan JShS bas dırektory Nursultan Jumabek.
Negizi, ındýstrııaldy-ınnovasııalyq damý memlekettik baǵdarlamasy aıasynda arnaıy uıymdastyrylǵan telekópirde Elbasynyń ruqsatymen «Aluminium of Kazakhstan» JShS alıýmınıı profılderin shyǵarý zaýyty iske qosylǵany málim. Qazirgi ýaqytta bul óndiris orny HOFFMANN Aluminium saýda tańbasymen joǵary tehnologııamen tolyq kezeńdi alıýmınıı profılderin óndirýshi zaýyt bolyp tabylady. Alıýmınıı profılderin shyǵarý zaýyty quıý sehy, 1540 jáne 2400 tonnalyq baspaldaqtan, oǵan qosa untaqty boıaý men anodtaý tizbeginen qurylǵan. Jalpy aýmaǵy 14 000 sharshy metr. Zaýyttyń tehnologııalyq úrdisi bastapqy kezeńdegi alıýmınııdi qaıta óńdeý jolymen 1000-nan asa túrli alıýmınıı profılderin eýropalyq standartqa saı shyǵarady. Zaýyttyń jobalyq qýaty – jylyna 16400 tonna. Zaýyt qyzmetkerleri Túrkııa men Qazaqstan Respýblıkasynyń joǵary kásibı ınjener-tehnolog mamandarynan quralǵan. Zaýyt iske qosylǵanyn beri 1500 tonnaǵa jýyq alıýmınıı buıymdaryn óndirdi.
Nurbol ÁLDIBAEV
