Ásem áýendi sýburqaq endi aýylda da bar

Sońǵy jyldary Barqytbeldiń baýyryndaǵy berekeli Tarbaǵataı eli jyldam kórkeıip keledi. Jýyrda aýdan ortalyǵy – Aqsýat­ta el Táýelsizdiginiń 25 jyl­dy­ǵyna oraı jańadan mýzykaly sýburqaq ashyldy. Atalǵan nysannyń ashylý saltanatynda jergilikti aqsaqaldar men aq kımeshekti ájelerden eńbektegen balalarǵa deıin júzderi bal-bul jaınap, erekshe qýanyshqa bólendi. Elbasy Nursultan Nazarbaev qalalar men aýyldardy abattandyrýǵa erekshe mán berip keledi. Sondyqtan, aýyl kósheleriniń ásem de ádemi, taza da kórikti bolýy kópshilikpen birge atqarylatyn, tárbıelik jáne mádenı máni joǵary is dep bilgen jón, – dedi aýdan ákimi Dildábek Orazbaev sýburqaqtyń tusaýkeserinde. Atalǵan sharada tarbaǵa­taı­lyqtar jaryq dıodty shamdarmen túrli túske enip, san qubylǵan sýburqaqtyń tamasha kórinisine tánti boldy. Ári jaryq shashyp, ári ásem áýender oınap turatyn sýburqaq áli-aq aqsýattyqtardyń súıinishine, súıikti demalys ornyna aınalady, desti turǵyndar. Osy ispetti sýburqaq jaqynda aýdan­nyń taǵy bir iri eldi mekeni sanalatyn Aqjar aýylynda da paıdalanýǵa berilmek. Aıta ketý kerek, keıingi ýa­qytta Tarbaǵataı aýdanynda mádenı eskertkishter, demalys oryndary kóptep ashylýda. Máselen, jýyrda boı kótergen Abaı, Muryn ana, Maqta apa men Baıjigit baba, Toǵas batyr eskertkishteriniń mańy gúl­dendirilip, jurtshylyq dem-ala­tyn saıabaqqa aınalyp úlgerdi. Dýman ANASh, «Egemen Qazaqstan» Shyǵys Qazaqstan oblysy, Tarbaǵataı aýdany