Premer-Mınıstr jumys saparymen Batys Qazaqstanǵa bardy

Memleket basshysynyń tapsyrmasymen óńirdiń áleýmettik-ekonomıkalyq damýyn baǵalaý úshin Premer-Mınıstr Kárim Másimov jumys saparymen Batys Qazaqstan oblysyna bardy. Pm.kz-tiń habarlaýynsha, Kárim Másimovtiń jumys sapary baǵdarlamasynda aımaqtyń eńbek ujymdarymen jáne qoǵam ókilderimen kezdesýi, ınfraqurylymdyq nysandardy, agrarlyq-ónerkásiptik keshen kásiporyndaryn aralaýy kózdelgen. Úkimet basshysy «Nurly jol» baǵdarlamasy aıasynda júzege asyrylyp jatqan «Oral – Tasqala – RF shekarasy» avtojoldaryn qaıta jóndeý barysyn baǵalaıtyn bolady. Aımaqtyń jáne jalpy elimizdiń kólik-logıstıkalyq jobalarynyń strategııalyq mańyzdylyǵyn eskere otyryp, Kárim Másimov Batys Qazaqstan oblysyndaǵy avtomobıl joldarynyń jaı-kúıi týraly keńes ótkizedi. Sonymen qatar, Premer-Mınıstr agrarlyq-ónerkásiptik keshen ókilderimen tamaq óńdeý ónerkásibiniń ózekti baǵyttaryn talqylap, «Kýbleı» qalbyrlaryn shyǵaratyn kásiporynǵa barady. Gaz salasynyń ózekti máseleleri men damý perspektıvalaryn kompanııalardyń, memlekettik organdar men salalyq qurylymdardyń basshylarymen kezdesý barysynda talqylaý josparlanýda. Aıdar О́RISBAEV