Jol qurylysy uzaqqa sozylýda

Sońǵy jyldary joldary shurq-tesik kúıge túsken qalalardyń biri – Oral. Munda bir shuńqyrdan qa­shyp avtokóligin kólbete aıdaǵan júr­gizýshi úsh shuńqyrǵa baryp soq­tyǵady. Osy oraıda, qala kóshe­lerindegi joldarǵa kúrdeli jóndeý jumystary júrgizilmeıdi desek, shyndyqtan alshaq ketip qalarmyz. Júrgiziledi. Biraq tenderdi jeńip shyqqan merdiger uıymdardyń jaıbaraqattyqqa salynýy saldarynan bul ister tym uzaqqa sozylyp ketip júr. Tipti, oblys orta­ly­ǵynda budan eki jyl buryn bas­tal­ǵan kóshe qurylystarynyń áli kúnge deıin aıaqtalmaı kele jat­qan­dary da bar. Munyń bári tańǵal­dyrady. Osy aralyqta kezinde osy jumystardy qolǵa alǵan burynǵy merdigerlerdiń izderin sýytyp ketý kórinisteri de kezdesip qalyp júr. Munyń bas­ty mysaly olardyń ornyna jańa merdigerlerdiń kelýi deýge bolady. Bıyl Oral qalasynda kóshe qury­lystary burynǵy jyldarmen sa­lys­tyrǵanda áldeqaıda erte bas­­taldy. Ony sáýir aıynyń ishin­­de qolǵa alý tájirıbesi, sirá, óńir­diń arǵy-bergi tarıhyn­da bolyp kór­megen shyǵar. Bıyl dál solaı boldy. Buǵan sáýir­diń aq tańy kezinde barsha batys­qazaq­standyqtar e, báse, osylaı bolýy kerek edi ǵoı dep kádimgideı rıza­­shy­lyqtaryn bildirgen edi. Alaı­da, qazirgi kúnderi olardyń kók­tem­degi kóterińki kóńil kúıleri sý sep­ken­deı basylyp qal­ǵany da anyq. Munyń basty sebebi kúrdeli jóndeý jumystarynyń uzaqqa sozy­lyp kele jatqany desek, qate­les­peımiz. Ásirese, búgingi kúni qala­nyń bas dańǵyly – Dostyqtyń boıyn­da joldy paıdalanýǵa be­rý mer­zimin keshiktirip otyr­ǵan «AzııaTehStroı» JShS qurylys­shy­la­rynyń jumysy mandymaı-aq qoı­ǵany kózge aıqyn kórinedi. Abaı ata­myz «Baıaǵy jartas – bir jartas, qańq eter tipti baıqamas», dep osyndaı­dy aıtsa kerek. Múm­kin olar jumys sapasyna birinshi kezek­te mán bergendikten, kúrdeli óndiris­tik teh­nologııalardy qol­danýǵa uzaq ýaqyt ketetindikten kesteni sozyp alǵan shyǵar. Bulaı deýdiń de eshqandaı qısy­ny joq. Qalaı degende de qala óte kúr­deli ınjenerlik júıe eken­ine eshkim talas týǵyza almaıdy. Sonyń ishinde qubyrlar júıe­sindegi qudyqtardy jóndeý isinde ala-qulalyq basym ekendigi belgili bolyp otyr. Sonda qalaı bolsa solaı, nemketti, sapasyz jumystar qabyldanyp ketse ne bolmaq? Qo­maq­ty qarajatty jelge ushyrý degen osy emes pe? Budan kim utady? Kim utylady? Onyń arǵy jaǵy aıt­pasa da belgili emes pe? Atalǵan qurylystyń uzaqqa sozy­lý qubylysy men kórinisi ob­lys­tyq jáne qalalyq ákimdik ǵı­ma­rattary ornalasqan tusta, ashy­ǵyn ári anyǵyn aıtqanda, qala jáne oblys ákimderiniń tup-týra kóz­deriniń aldy men ıekteriniń astynda oryn alýda. Sonda qalanyń shet ja­ǵyndaǵy jumys yrǵaǵynyń múl­dem qozǵalmaı qalmasyna kim kepil? Qazirgi qolda bar derekter «AzııaTehStroı» JShS jón­deý jumystary kestesinen on eki pa­ıyzǵa, ıaǵnı jıyrma kúnge keıin qalyp qoıǵanyn kórsetedi. Bul tur­ǵyda qala kóshelerin jón­deý­ge basty suranys berýshi KPO b.v. kompanııasynyń ókili Samat Sár­­senǵalıev atalǵan qury­lys kompanııa­syna uzaqqa sozyp júr­gen saldyr-salaq isteri úshin aıyp salǵanyn málimdedi. Al ókili Artýr Qabdyǵalıev bolyp tabylatyn «Baltemen» JShS iske shuǵyl qarqyn týǵyzbasa, onyń jaǵdaıy budan da aýyr bolatyn túri bar. Iаǵnı, Oral qalasynyń ákim­digi qalanyń jańa shaǵyn aýdan­dary­n­daǵy jol qurylysy isin aqsatqany ári ony sapasyz júr­gizgeni úshin mer­di­ger­di sotqa bere­tin túr tanytsa, bu­ǵan tańǵalý­dyń eshqandaı jóni joq. Bıyl Oral qalasyndaǵy on tórt kósheni kúrdeli jóndeýden ótkizý kózdelgen. Bul jańadan jıyrma shaqyrym jol salyna­dy degen sóz. Atalǵan aýqym­dy is KPO b.v shetel­dik kompanııa­synyń Oral óńi­rin­degi áleýmettik joba­larǵa bóletin qara­jaty esebinen qarjy­lan­dy­rylǵan. Aldaǵy kezde is alǵa jyljyp, atalǵan mer­di­ger uıym­dar jumys sapasyn kóterip, kes­tede kórsetilgen mer­zimdi qýyp jete ala ma? Ázirge bul saýalǵa bir­jaq­ty jaýap qaı­tarý qıyn-aq. Buǵan ýaqyttyń ózi tóreshi bolmaq. ORAL