Jazıranyń jany da jomart

Biz Jazıra Japparquldyń ákesi Ábdirahman Qudaıqulov aǵamen jedel tildesip úlgerdik. Rıo tórinde elimizdiń abyroıyn asyryp, mereıin ósirip jibergen aýyr atlet Jazıra Japparquldyń Arys qala­sy aýmaǵyndaǵy Maqtaly aýylyndaǵy úıin tabý qıyn­ǵa túspedi. Mekteptiń túbine ornalasqan sol batyr qyz týǵan shańyraqqa kelgenimizde kishigirim toı ústinen tústik. – Olımpıadany tikeleı efırden kórdik. Úıge kórshilerim men aǵaıyndarym kelip, qoldaý kórsetti, – dedi ol. – Qyzymnyń jeńiske jetken kezindegi qýanǵanymdy sózben aıtyp jetkize almaımyn. Qatty tolqydym. Anasy bir ornynda otyrmaı, úıge kirip-shyǵyp júrdi. Bári bitkennen keıin telefonym shyryldady. Alsam – Jazıra. «Kóke, kórgen shyǵarsyzdar, bári jaqsy. Elge sálem aıtyńyz», dedi. – Shyny kerek, men de, anasy da Jazıranyń ziltemirshi bolýyna qarsy boldyq. Degenmen, úsh kún baryp kórsin, unasa jalǵastyrsyn dedim. Sóıtip, úlken sporttaǵy joly bastaldy. Bula kúshi óz atasy Japparqul men naǵashysy Ámetbek atadan darydy dep oılaımyn. Atasy Japparqul men ájesi Umytshaqtyń árýaǵy bir aýnap túsken shyǵar. Qyzym tapqan tabysyn otbasy ıgiligine jumsaıdy. О́tken jyly «kóligim bar» dep qarsy bol­ǵanyma qaramaı, maǵan jańa avtokólik áperdi. Jazıramnyń bizdiń áýlettiń ǵana emes, Qazaq eliniń batyr qyzyna aınalǵanyna qýanyshtymyn. Deni saý bolsyn, – dedi júzi meıirimge tolǵan áke. «Alma aǵashynan alysqa uza­maıdy» demekshi, Jazıranyń sport juldyzyna aınalýyna ata-anasynyń da qatystary bar eken. 43 jyldaı temirjol salasynda eńbek etken Ábdirahman aǵa jas kezinde fýtboldy jaqsy oınapty. Tańǵaldyrǵan jańalyq, oqýshy kezinde Jazırany keı sátteri óz anasy da jattyqtyrypty. Ol týraly sóz qozǵaǵan tolaǵaı qyzdyń anasy Kúláıhan Qudaıqulova: «Jazırashymnyń erekshe qyz bolatynyn bosanǵan kezimnen bildim. Dárigerler: «Myna qyzdan jurt tańǵalatyn myqty adam shyǵady», dedi. Aıtqandary keldi. Keıde Jazıra birdeńege renjise, jattyqtyrýshysy Dúısebek Qurmanov aǵaıdy tyń­damaı ketetin. Birde bapkerge jat­tyǵýlaryn jazyp berýin, mundaı kezde ózim bas-kóz bolatynymdy aıttym. Sóıtip, onyń jazýy boıynsha ózim de jattyqtyryp júrdim», – dedi aǵynan aqtaryla. Ápkesi Elmıra Qudaıqulova kishkentaı kezinde Jazıraǵa ózi qaraǵanyn aıtsa, jezdesi Álıhan Syrlybaev óte qaıyrymdy ekenine toqtaldy. – Shetelden kelgen saıyn baý­yr­­­la­ryna, ini-sińlilerine syı­lyq ákelýdi umytqan emes. Ol bir­neshe jyl buryn marqum bolyp ketken bajamyzdyń qyzy, jıen sińlisi Álfııanynyń em-domyna kómektesip, qymbat dári-dármekterin áperip júrdi, – dedi ol. Jazıra 4-synypqa deıin oqyǵan №372 mekteptiń dırektory Tájigúl Esilbekova men onyń orynbasary Álibek Qazy­bekov oqýshylar dúldúl áp­ke­lerimen kezdesýge daıyndalyp jatqanyn jetkizdi. Tolaǵaı qyzdy úlken sportqa úkilep qos­qan alǵashqy jattyqtyrýshysyna kezdes­tik. Jetpisten asqan qarııa­nyń shá­kirti jeńisine qatty qýan­ǵany, tolqyǵany ańǵarylyp tur. Ol ózi biraz baptaǵannan keıin Jazırany Shymkentke bilikti bapkerler qolyna qalaı attandyryp salǵanyn aıtyp berdi. – Batamdy berip, Rashıd Tóle­ge­novke tapsyrdym. Ol Jazı­rany óz úıine ornalastyrdy. Qy­zymyz Sıngapýrdegi Jas­óspi­rimder olımpıadasynda chem­pıo­n atanǵanda, tóbem kókke jetti. Almaty men Hıýstondaǵy álem chempıonattarynda kúmis júlde aldy. Bul jeńisine áýeli Alla, sosyn ata-anasy, barsha bapkerleri jáne el­diń aq tilegi sebep boldy dep oılaımyn, – dedi eńbek sińirgen jat­tyqtyrýshysy Dúısebek aq­saqal. Biz barǵanda Ábdirahman aǵanyń úıinde qoı soıylyp, qýyrdaq daıyn­dalyp jatty. Qutty bolsyn aıtyp kelip-ketip jatqan jandarda esep joq. Aǵamyzdyń telefony da tynym tappady. Eldiń qýanatyndaı, shattanatyndaı jóni bar. Sebebi, Jazıranyń jeńisi – barsha qazaqtyń jeńisi! Ǵabıt SAPARBEKOV Ońtústik Qazaqstan oblysy Sýretti túsirgen Qaısar ShERIM