Umytshaq pa, uıalshaq pa?

Memlekettik qyzmetkerlerge talap kúsheıdi. Olardy irikteýdiń jańa júıesi jasaldy. Soǵan oraı ár memlekettik qyzmetkerge, ásirese, basqarma basshylaryna júkteler jaýapkershilik júgi de artty. Alaıda, jaýapkershilikti jete seziný áli de olqy túsip jata­tynyn qaıtersiz? Osy sózimizge dálel kerek pe? Ony oblys ákiminiń ózi alǵashqy jarty­jyl­dyq qorytyndylaryna arnalǵan otyrysta keltirdi. Sonda keı basqarma basshylary óz salalary boıynsha qansha jumys orny ashylǵanyn dáıekti derektermen aıta almaǵan edi. – Ashylǵan jumys orny týraly aqparatty bárińiz bilip otyrýyńyz kerek, – dedi oblys  ákimi Nurlan Noǵaev. – Jaýapkershilikten qashyp, jumystaryńyzdyń aıasyn shektep otyrsyzdar. Árbir basqarma bólek álemde ómir súrip jatqandaı. Bıýdjetten bólingen aqshanyń basty maqsaty – jumys oryndaryn ashý. Kásipkerlik basqarmasy aqshanyń qalaı jumsalyp jatqanyn bilmese, jumys ornymen qamtý basqarmasy qansha jumys ornynyń ashylyp jatqanyn bilmese, aýyl­sha­rýashylyq basqarmasy óz aldyna habarsyz bolsa, ne úshin jumys istep jatyrmyz? Bizdiń maqsatymyz – aqsha bólý emes, jumys ornyn ashý, ekonomıkany damytý. Bólingen aqshanyń qalaı paıdalanylyp jatqanyn qadaǵalaý kerek. Basqarmalar arasynda baılanys bolsyn... Mine, osynyń ózinen atalǵan bas­qarmalardyń basshylary óz mindetterin nemquraıly atqara­tynyn baıqaýǵa bolatyndaı. Árıne, ár basqarmanyń óz jos­pary, soǵan oraı atqaratyn ju­mysy árqıly bolar. Biraq, bári­niń múddesi bir, ıaǵnı óńirdiń áleýmettik-ekonomıkalyq damýyna úles qosý emes pe? Endeshe, bas­qarma basshylary bir-birimen ózara baılanys ornatýdy kózdeýi tıis qoı. Alaıda, dál qazir olaı bolmaı turǵany ókinishti. Bas-basyna bı bolýdy kózdeı me, álde ortaq maqsat jolyndaǵy derek­terdi bir-birinen qyzǵana ma? At­qaryp otyrǵan jumystary jónin­degi derekterdi aıtýǵa kelgende nege umytshaq bola qalady? Bálkim, basqarmalar basshylary tym uıalshaq pa? Qalaı bolǵanda da, bas­qar­ma basshylary ashyqtyq qa­ǵıdatymen eshteńeni búrke­me­lemegenin qalar edik... Joldasbek ShО́PEǴUL, «Egemen Qazaqstan» ATYRAÝ